Bakı. 9 fevral. REPORT.AZ/ "Bakı və Abşeron yarımadasında qeydə alınan zəlzələlər Xəzər dənizindəki zəlzələ ocaqlarının aktivləşməsi nəticəsində baş verir".
"Report"un məlumatına görə, bunu AMEA Respublika Seysmoloji Xidmət Mərkəzinin direktoru Qurban Yetirmişli bu gün keçirdiyi mətbuat konfransında deyib.
O bildirib ki, Xəzər dənizi həm palçıq vulkanları, həm də zəlzələ ocaqları ilə zəngindir: "Xəzərin cənubundan tutmuş şimalına qədər zəlzələ ocaqları var. Xəzərdə potensial gücə malik zəlzələlər var".
Mütəxəssis qeyd edib ki, dənizdibi seysmik stansiya alınıb: "Onların yeri də müəyyənləşdirilib və layihələndirmə işləri aparılıb. Ancaq müəyyən çətinliklər üzündən hələ quraşdırılmayıb".