​“Qara Rəhilə” ləqəbli cibgirin məhkəməsində polis əməkdaşı ifadə verib

Bakı. 20 oktyabr. REPORT.AZ/ Bu gün Bakı Ağır Cinayətlər Məhkəməsində oğurluq və qanunsuz olaraq narkotik vasitələri satmaqda təqsirləndirilən 1954-cü il təvəllüdlü Rəhilə İsmayılova, 1952-ci il təvəllüdlü Məleykə Şamilova, 1970-ci il təvəllüdlü Mətanət Şamilova, 1973-cü il təvəlldülü Natəvan Şamilova və 1994-cü il təvəllüdlü Məcid Şamilovun cinayət işi üzrə növbəti məhkəmə prosesi keçirilib.

"Report"un xəbərinə görə, hakim Əfqan Hacıyevin sədrlik etdiyi prosesdə şahidlər - Solmaz Kəlbiyeva və Rəvan Əliyev ifadə verib.

S.Kəlbiyeva dindirilərkən bildirib ki, polislər Rəhilə İsmayılovanın əl çantasına baxış keçirən zaman hal şahidi olub: "Ötən ilin yayında polis bölməsinin yanından keçirdim. Polislər məni şöbənin qabağına çağırdılar. Rəhilə İsmayılovanı göstərib dedilər ki, onun çantasına baxış keçiririk. Mən də həmin zaman hal şahidi kimi orada iştirak etdim. Çantadan pul kisəsi, 60 manat pul və Arifə adlı xanımın adına olan şəxsiyyət vəsiqəsi çıxdı".

R.İsmayılova isə S.Kəlbiyevanın düzgün danışmadığını, həmin zaman əl çantasında şəxsiyyət vəsiqəsinin olmadığını deyib.

Səbail Rayon Polis İdarəsinin əməkdaşı Rəvan Əliyev M.Şamilovu saxlayarkən onun cibində narkotik maddə olduğunu bildirib: "Bu şəxslər haqda bizə məlumat daxil oldu. Əməliyyat zamanı Məcid Şamilovun üzərindən narkotik maddə götürüldü".

Məhkəmənin növbəti iclası oktyabrın 29-na təyin edilib.

Qeyd edək ki, təqsirləndirilən şəxslər ötən il Səbail rayonu, Zərifə Əliyeva küçəsində saxlanılıblar. Yaxalanan şəxslərin üzərinə baxış keçirilərkən M.Şamilovdan 3,75 qram, R.İsmayılovadan isə 3,93 qram həşiş qətranı aşkar olunaraq götürülüb.

Sumqayıt şəhər sakini, "oğru" aləmində "Qara Rəhilə" kimi tanınan R.İsmayılova Sumqayıt və Bakıda çoxsaylı oğurluq və cibgirlik əməlləri törətməkdə təqsirli bilinir. O, sonuncu dəfə 2012-ci ildə Nəsimi Rayon Məhkəməsinin hökmü ilə 2 il müddətinə azadlıqdan məhrum edilib. R.İsmayılova 2014-cü ilin may ayında azadlığa buraxılsa da, cəmisi 3 ay azadlıqda qala bilib. R.İsmayılova əvvəllər də cibgirlik və narkotik maddə saxlamaqda ittiham olunaraq 10 dəfədən çox məhkum olunub. "Qara Rəhilə" və onunla birgə həbs olunan şəxslərin əməllərindən zərər çəkənlərin sayı 15 nəfərdir.

Təqsirləndirilən şəxslər Cinayət Məcəlləsinin 177.2.1 (oğurluq, qabaqcadan əlbir olan bir qrup şəxs tərəfindən törədildikdə), 234-cü (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma), 180-ci (soyğunçuluq) və 326-cı (rəsmi sənədləri, ştampları, möhürləri oğurlama və ya məhv etmə) maddələri ilə ittiham olunurlar.

Xatırladaq ki, M.Şamilova ilə N.Şamilova M.Şamilovanın gəlini, M.Şamilov isə onun nəvəsidir. R.İsmayılova isə M.Şamilova ilə qudadır.