Lənkəranda yol qəzasında sürücü yanaraq ölüb - FOTO - YENİLƏNİB - VİDEO

Fövqəladə Hallar Nazirliyi Lənkəranda ölümlə nəticələnən qəza ilə bağlı məlumat yayıb.

"Report"un xəbərinə görə, məlumatda bildirilib ki, Lənkəran şəhərinin Girdəni kəndində VOLVO və “QAZel” markalı iki yük avtomobilinin toqquşması nəticəsində yanğın hadisəsi baş verib.

Hadisə yerinə Nazirliyin Dövlət Yanğından Mühafizə Xidmətinin yanğından mühafizə bölmələri və Cənub Regional Mərkəzinin xilasediciləri cəlb olunub. Yanğın nəticəsində “QAZel” markalı yük avtomobilinin mühərrik hissəsi, kabinəsi və banında olan 3 ton arpanın 1,5 tonu yanıb. Yanğın yerinin kəşfiyyatı zamanı 1 nəfərin (şəxsiyyəti dəqiqləşdirilir) yanmış meyiti xilasedicilər tərəfindən nəqliyyat vasitəsindən çıxarılaraq aidiyyəti üzrə təhvil verilib. Digər avtomobil yanğından mühafizə olunub. Yanğın yanğından mühafizə bölmələri tərəfindən söndürülüb.

"Report"un bölgə müxbirinin əldə etdiyi məlumata görə, ölən şəxs Cəlilabad rayonunun Alar kənd sakini, 1983-cü il təvəllüdlü Əzizov Rasif Nabatəli oğludur.

***09:50

Lənkəran rayonunda yol qəzası baş verib, sürücü ölüb.

“Report”un Cənub Mərkəzinin verdiyi xəbərə görə, hadisə Ələt-Astara-İran İslam Respublikası ilə dövlət sərhədi avtomobil yolunun 196-cı km-də, Lənkəran rayonunun Girdəni kəndindən keçən ərazisində qeydə alınıb.

Belə ki, Rusiya vətəndaşına məxsus qoşqulu yük maşını ilə Cəlilabad rayon sakininin idarə etdiyi "QAZel" markalı yük maşını toqquşub.

Nəticədə "QAZel" markalı yük avtomobili alovlanıb. Yanğın zamanı sürücü ölüb, avtomobildə olan Cəlilabad rayonunun Alar kənd sakini, 1981-ci il təvəllüdlü Xalim Qulaməli oğlu Cəfərov xəsarət alıb.

Hadisə yerinə Fövqəladə Hallar Nazirliyinin xilasetmə briqadası və Yanğından Mühafizə Xidmətinin bir yanğınsöndürən maşını cəlb edilib. Yanaraq ölmüş sürücü Məhkəmə-Tibbi Ekspertizası və Patoloji Anatomiya Birliyinin Lənkəran Şöbəsinə təhvil verilib. Yaralanan sərnişin isə Lənkəran Rayon Mərkəzi Xəstəxanasına çatdırılıb.

Faktla bağlı araşdırma aparılır.