Biləsuvarda transformatorda qəza baş verib, iki kənd işıqsız qalıb

Biləsuvar rayonunun iki kəndi elektrik enerjisiz qalıb.

"Report"un Muğan bürosunun məlumatına görə, ötən gün axşam saatlarından etibarən rayonun Nərimankənd və Səmədabad kəndlərində hazırda elektrik enerjisi yoxdur.

Biləsuvar Elektrik Şəbəkəsindən bildirilib ki, Nərimankəndin elektrik transformatorunda qəza baş verib.

Qeyd olunub ki, bu kəndlərin elektrik təminatı daşıyıcısı xətti eynidir. Yaranmış qəza ilə əlaqədar xətt gərginlikdən ayrılıb. Qəzanın aradan qaldırılması üçün işlər aparılır, yaxın vaxtlarda işlər tamamlanaraq, kəndlərin elektrik enerjisi bərpa olunacaq.