Bərdədə narkotiklə tutulan şəxs xəstəxanada ölüb

Bərdə. 19 noyabr. REPORT.AZ/ Bərdə rayonunda evində tiryəkxana təşkil etdiyi üçün tutulan şəxs xəstəxanada ölüb.

"Report"un Qarabağ bürosunun verdiyi məlumata görə, noyabrın 9-da rayon sakini Mirxaliq Mirkazım oğlu Novruzov evində tiryəkxana təşkil etdiyi üçün Bəərdə Rayon Polis Şöbəsinin əməkdaşlarının keçirdiyi əməliyyat zamanı saxlanılıb. 

Bərdə Rayon Məhkəməsinin qərarı ilə M.Novruzovun barəsində iki ay müddətinə həbs qətimkan tədbiri seçilib. O, Gəncə şəhərindəki 2 saylı İstintaq Təcridxanasına göndərilib. Burada sağlamlığında ciddi problem yarandığı üçün Bakı şəhərindəki xəstəxanalardan birinə yerləşdirilib. M.Novruzov yerləşdirildiyi xəstəxanada ölüb. Onun uzun illərdir ki, narkotik maddə aludəçisi olduğu bildirilir.