Baş Prokurorluqda videokonfrans keçirildi

Prokurorluq işçilərinin peşə bayramı ərəfəsində Azərbaycan Prokurorluğunun yaranması və inkişaf tarixi, prokurorluq orqanlarının formalaşma mərhələləri, hüquqi statusu və dövlət hüquq sistemində yeri mövzusunda 25 sentyabr 2020-ci il tarixində Azərbaycan Respublikası Baş prokurorun müavini Heydər Məmmədovun rəhbərliyi ilə videokonfrans keçirilib.

Bu barədə "Report"a Baş Prokurorluğun Mətbuat Xidmətindən məlumat verilib.

Bildirilib ki, peşə bayramı ərəfəsində həyata keçirilən tədbirlərin davamı olan bu konfransda Baş Prokurorluğun, Azərbaycan Respublikasının Hərbi, Naxçıvan Muxtar Respublikasının, Naxçıvan Muxtar Respublikasının Hərbi, tabe rayon (şəhər) prokurorluqlarının 60 əməkdaşı iştirak edib.

Konfransı giriş sözü ilə açan Baş prokurorun müavini Heydər Məmmədov konfrans iştirakçılarını qarşıdan gələn prokurorluq işçilərinin peşə bayramı münasibətilə təbrik edərək, ölkə başçısı İlham Əliyevin siyasi iradəsinə uyğun olaraq hazırda ölkəmizdə həyata keçirilən yeni dövrün çağırışlarından irəli gələn tam və hərtərəfli islahatlar, dövlət idarəçiliyinin bütün sferalarında mütərəqqi kompleks tədbirlər barədə məlumat vermiş, bu islahatların əsas istiqamətlərindən olan məhkəmə-hüquq sisteminin keyfiyyətcə yenilənməsi prosesinin Azərbaycan Prokurorluğunu da əhatə etməsini və yenilənmə prosesində əldə edilən nəticələri konfrans iştirakçılarının diqqətinə çatdırılıb.

Daha sonra videokonfransda Baş Prokurorluğun idarə rəisləri - Natiq Hüseynov, Fazil Həsənəliyev, Ceyhun Kazımov, Aynur Osmanova, Mətbuat xidmətinin rəhbəri Günay Səlimzadə, Elm-Tədris Mərkəzinin rəisi Mübariz Əhmədov, Bakı şəhəri Xətai rayon prokuroru Sərdar İmanov, Hərbi Prokurorluğunun Hüquqi təminat və insan hüquqları məsələləri şöbəsinin rəisi Səməd Əliyev, Naxçıvan Muxtar Respublikası Prokurorluğunun Hüquqi təminat və insan hüquqları məsələləri şöbəsinin rəisi Faiq Səfərov və Baş Prokurorluğun Elm-Tədris Mərkəzinin Prokurorluq işçilərinin fəaliyyətinin qiymətləndirilməsi və peşə hazırlığının təşkili şöbəsinin rəisi Talıb Cəfərov prokurorluğun yaranması və inkişaf tarixi, prokurorluq orqanlarında aparılan genişmiqyaslı islahatlar, o cümlədən məqsəd və hədəflər barədə müvafiq mövzularla ətraflı çıxışlar ediblər.

Çıxışlardan sonra videokonfrans iştirakçıları arasında faydalı fikir mübadiləsi və müzakirələr aparılıb.

Sonda Baş prokurorun müavini tərəfindən seminara yekun vurulub.