Bakıda tanışına qarşı 350 min manatlıq dələduzluq edən şəxsə hökm oxunub

Bu gün Bakı Ağır Cinayətlər Məhkəməsində tanışına qarşı dələduzluq etməkdə təqsirləndirilən Süleyman İbrahimovun cinayət işi üzrə məhkəmə iclası başa çatıb.

"Report"un məlumatına görə, hakim Faiq Qəniyevin sədrliyi ilə keçirilən prosesdə hökm oxunub.

Məhkəmənin hökmü ilə S.İbrahimov 7 il 6 ay müddətinə azadlıqdan məhrum edilib.

Qeyd edək ki, S.İbrahimov tanışı Rəna Ələsgərovanı Bakıda yerləşən poliklinikalardan birinə həkim düzəldəcəyi və digər işlərini həll edəcəyini deyərək ondan 350 min manat pul alıb. Lakin sonradan o, verdiyi sözə əməl etməyib.

İstintaq dövründə zərərçəkmişə dəyən ziyandan 120 min manat ödənilib.