“MilliÖn”dən 122 min manatdan çox pul oğurlamaqda təqsirləndirilən şəxsin ibtidai istintaqı yekunlaşıb

Bakıda “MilliÖn” terminallarından 122 min manatdan çox pul oğurlamaqda təqsirləndirilən İlqar Əlixanovun cinayət işi üzrə ibtidai istintaqı yekunlaşıb.

"Report"un məlumatına görə, iş baxılması üçün Xəzər Rayon Məhkəməsinə göndərilib.

Cinayət işi hakim Zeynəb Axundovanın icraatına verilib. 

Məhkəmənin hazırlıq iclasının vaxtı hələlik açıqlanmayıb.

Qeyd edək ki, bu ilin əvvəlində Bakı Şəhər Baş Polis İdarəsinin (BŞBPİ) Cinayət Axtarış İdarəsi əməkdaşlarının keçirdiyi uğurlu əməliyyat-axtarış tədbirləri nəticəsində oğurluq əməlini törətməkdə şübhəli bilinən 1985-ci ildə Gürcüstan Respublikasında anadan olan, Bakı şəhəri Xəzər rayonu Şağan qəsəbəsində yaşayan, ali təhsilli Əlixanov İlqar Novruz oğlu müəyyən olunaraq tutulub.

İdarəyə daxil olan əməliyyat məlumatı əsasında müəyyən olunub ki, müvafiq olaraq işlədiyi şirkətin inkasatr vəzifəsində çalışan İ.Əlixanov paytaxtın və respublikanın müxtəlif rayon və şəhərlərində olan “MilliÖn” ödəmə terminallarından ayırı-ayırı vaxtlarda gizli yolla 122 742 manat və 1200 ABŞ dollarını talayıb.

İctimai təhülükəli əməldə şübhəli bilinən şəxs ətrafında davam etdirilən əməliyyat tədbirləri ilə onun yaşadağı evinə baxış zamanı müxtəlif vaxtlarda taladığı 42 145 manat və 9 400 ABŞ dollar aşkarlanaraq maddi subut kimi götürülüb.

Eləcə də onun ictimai təhlükəli əməldə istifadə etdiyi alətlər, müxtəlif təyinatlı geyimlər aşkarlanıb. Müəyyən olunub ki, o, ödəmə terminallarına məxsus açarlarını sürətini çıxamaqla, kustar üsulla hazırladığı yivlərlə 43 epizod üzrə ayrı-ayrı ünvanlarda bu əməlləri törədib.