Bakıda güclü küləyin dağıtdığı dam örtüyü ətrafdakı insanlara təhlükə yaradıb - FOTO - VİDEO

Bakı. 10 yanvar. REPORT.AZ/ Güclü külək Bakıda yeni tikilən binanın dəmir dam örtüklərini uçurub və bu da ətrafdakı insanlara təhlükə yaradıb.

"Report"un xəbərinə görə, hadisə Binəqədi rayonu, Süleyman Sani Axundov küçəsində baş verib.

Belə ki, ötən gecə güclü külək hələlik tikintisi tam başa çatmamış "Kristal Abşeron"a məxsus çoxmərtəbəli binanın damına vurulan dəmir örtükləri yerə dağıdıb. Dəmir örtüklər yoldan keçən avtomobillərin üzərinə düşüb. Bu da insanlar üçün ciddi təhlükə yaradıb, amma xəsarət alan olmayıb.

Hadisə yerinə Binəqədi Rayon Polis İdarəsinin əməkdaşları gəliblər. Polis Şövkət Məmmədova küçəsi, o cümlədən Süleyman Sani Axundov küçəsinin hər iki tərəfində postlar qurub. Yolda avtomobillərin hərəkət istiqaməti dəyişdirilib. Polis yaxınlıqdan keçən insanların təhlükəsizliyini təmin edib.

Daha sonra hadisə yerinə binanın tikintisini aparan iş icraçıları gəliblər. Usta və fəhlələr binanın damına çıxaraq çətinliklədə olsa təhlükənin qarşısını alıblar. 

İş icraçıları "Report"un hadisə yerindəki çəkiliş qrupuna mane olmağa çalışıb. Onlar "təhlükənin qarşısını qabaqcadan almaq olardımı" sualına belə cavab veriblər: "Təbii fəlakətdir belə olmalıdır".

Ətrafdakı binanın və şadlıq evinin həyətyanı sahəsinə düşən dəmir parçaları sakinlərin köməyi ilə təhlükəsiz yerə daşınıb.

Hadisə ilə bağlı Binəqədi Rayon Polis İdarəsində araşdırma aparılır.