Bakıda gənc xanımı avtomobil vurub, sürücü hadisə yerindən yayınıb

Bakıda piyadanın vurulması ilə nəticələnən növbəti yol-nəqliyyat hadisəsi baş verib.

“Report” xəbər verir ki, hadisə paytaxtın Binəqədi rayonu Biləcəri qəsəbəsində qeydə alınıb.

Belə ki, qəsəbə sakini 24 yaşlı Raya adlı xanım yaşadığı küçədə hərəkət edərkən naməlum avtomobil tərəfindən vurulub. Piyadanı vuran sürücü hadisə yerindən yayınıb.

Yaralı təcili yardımın köməkliyi ilə 1 saylı Kliniki Tibbi Mərkəzə ("Semaşko") çatdırılıb.

Mərkəzin həkimləri bildirib ki, xəsarət alan piyada müayinə olunub və ona qapalı kəllə-beyin travması və bədənin müştərək travması diaqnozu qoyulub.

Vəziyyəti ağır olduğu üçün reanimasiya şöbəsinə yerləşdirilib.

Faktla bağlı araşdırma aparılır. 

Ramin Şahbazov