6.5 milyon manatlıq cinayət işi üzrə məhkəmə iclası davam etdirilib

Bakı. 14 yanvar. REPORT.AZ/ Bu gün Bakı Ağır Cinayətlər Məhkəməsində Azərbaycan Gözdən Əlillər Cəmiyyətinin külli miqdarda dələduzluqda təqsirləndirilən sədri Səmyar Abdullayev, vəzifəli şəxsi Himmət Şükürov və Nərimanov Rayon İcra Hakimiyyətinin sabiq əməkdaşı Niyaməddin Şıxəliyevin cinayət işi üzrə məhkəmə iclası davam etdirilib.

"Report"un xəbərinə görə, hakim Novruz Kərimovun sədrliyi ilə keçirilən prosesdə şahid qismində Bakı Şəhər İcra Hakimiyyətinin sabiq Aparat rəhbəri Rasim Quliyev ifadə verib.

2010-2018-ci illərdə Bakı Şəhər İcra Hakimiyyətinin Aparat rəhbəri vəzifəsində çalışmış R.Quliyev deyib ki, 2018-ci ildə struktur dəyişikliyi aparılarkən vəzifəsindən uzaqlaşdırılıb: "Çalışdığım dövrlərdə vəzifəm strukturlara, şöbələrə nəzarət etmək, işləri əlaqələndirmək, göndərilən məktubları cavablandırmaq idi".

O qeyd edib ki, Nərimanov rayonunda olan gözdən əlil şəxslərlə bağlı problemlərdən ilk dəfə mətbuatdan xəbər tutub: "O zaman bizə şikayətlər daxil oldu. Həmin şikayətlər üzrə biz adiyyatı üzrə cavablar verdik. Rayon İcra Hakimiyyətlərinin verdiyi hər hansı bir sərəncama biz münasibət bildirmirdik. Bizə məktublar məlumat daxil olurdu. Həmin vaxt da Nərimanov Rayon İca Hakimiyyəti tərəfindən bizə məktub daxil olmuşdu. Məktubda göstərilirdi ki, siyahıya daxil olan əlil şəxslər növbəyə alınır. Biz də həmin məktuba "etiraz etmirik" cavabı yolladıq".

Keçmiş Aparat rəhbəri bildirib ki, Bakı şəhər İcra Hakimiyyətinin balansında tikinti ilə bağlı hər hansı bir fond yoxdur: "Yəni, konkret olaraq hazırda icra hakimiyyəti bina tikmir. Sadəcə Sovet dövründən qalma strukturda mənzil şöbəsi var. O vaxt bununla bağlı bizə şikayətlər daxil olurdu, qəbula gəlirdilər. Biz də onlara izah edirdik ki, bu Bakı Şəhər İcra Hakimiyyətinin səlahiyyətlərinə daxil olan bir məsələ deyil".

Proses günün ikinci yarısında davam etdiriləcək.

Qeyd edək ki, S.Abdullayev və digərləri Cinayət Məcəllləsinin 178.3.2-cü (külli miqdarda dələduzluq) maddəsi ilə ittiham olunur. İş üzrə 100-dən çox zərərçəkmişin olduğu qeyd edilib. Dəyən zərər isə ümumilikdə 6.5 milyon manatdır.

İttihama görə, iş üzrə zərərçəkənlərdən əlillər üçün tikiləcək binadan mənzil veriləcək adı ilə pullar alınıb. Lakin verilən sözlərə əməl edilməyib.