Bakı. 13 dekabr. REPORT.AZ/ "Xəzər Lənkəran" klubunun sabiq baş məşqçi Mustafa Dənizli sonuncu iş yeri olan Türkiyənin "Qalatasaray" klubundan aldığı pulu geri qaytarıb.
"Report"un məlumatına görə, bu barədə Türkiyədə yayımlanan "Telegol" proqramının aparıcısı Serhat Ulueren bildirib.
O, M.Dənizli ilə danışdığını və 2015-ci ilin oktyabrında "Qalatasaray"a baş məşqçi təyin olunan mütəxəssisin klubdan aldığı pulu geri verdiyini bildirib: "Qalatasaray"dan aldığı pulu geri qaytarıb. Beş həftə daha qalsaydı, çox məbləğdə pul alacaqdı. Amma uğur qazanmadığı üçün istefa verməyi üstün tutub. "Məni mən edən "Qalatasaray"dır, bu pulu ala bilməzdim" deyib".
M.Dənizli "Qalatasaray" klubunun baş məşqçiliyindən bu il martın 1-də istefa verib.
Qeyd edək ki, o, 2013-cü il dekabrın 3-də "Xəzər Lənkəran"la müqavilə imzalayıb. Elə həmin mövsümün sonunda da komanda ilə yollarını ayırıb.