Bakı. 11 yanvar. REPORT.AZ/ "Napoli" futbol üzrə İtaliya Kubokunun 1/8 final mərhələsində "B" Seriyasında çıxış edən "Spetsiya"nı məğlub edərək ¼-ə vəsiqə qazanıb.
"Report" xəbər verir ki, Neapol şəhərində keçirilən görüş ev sahiblərinin 3:1 hesablı qələbəsi ilə başa çatıb.
Qalib komandanın heyətində Pyotr Zelinski (3-cü dəqiqə), Emanuele Cakkerini (55) və Manolo Qabbyadini (57) fərqləniblər. "Spetsiya"nın heyətində yeganə qolu Antonio Pikkolo (35) vurub.
Neapol klubu ¼-də "Fiorentina"-"Kyevo" cütünün qalibi ilə qarşılaşacaq.