Bakı. 22 sentyabr. REPORT.AZ/ Çexiya millisinin və İtaliyanın “Roma” komandasının futbolçusu Patrik Şikin təkrar müayinəsinin nəticəsi açıqlanıb.
“Report” paytaxt klubunun rəsmi saytına istinadən xəbər verir ki, A seriyasının IV turunda “Verona”ya qarşı debüt matçında zədələnən 21 yaşlı hücumçunun 2 həftə yaşıl meydanlardan kənar qalacağı dəqiqləşib. Onun sol bud əzələsində şiş aşkarlanıb.
Bu isə o deməkdir ki, hazırda müalicəsini davam etdirən futbolçu sentyabrın 27-də Çempionlar Liqasının II turunda “Qarabağ”la səfər oyununu buraxacaq. O, həmçinin Çexiya yığmasının oktyabrın 5-də Bakıda Azərbaycan millisinə qarşı keçirəcəyi 2018-ci il dünya çempionatının seçmə qrup matçında da iştirak edə bilməyəcək.
Qeyd edək ki, Patrik Şik yay fasiləsində “Sampdoriya”dan “Roma”ya transfer olub.