Çempionlar Liqası: "Real Madrid" , "Tottenhem" və "Mançester Siti" 1/8 finala yüksəlib - YENİLƏNİB - VİDEO

UEFA Çempionlar Liqasının qrup mərhələsində V tura start verilib.

"Report"un məlumatına görə, ilk oyun günündə A, B, C və D qruplarındakı komandalar qarşılaşıblar.

Türkiyənin turnirdəki yeganə təmsilçisi "Qalatasaray" İstanbulda Belçikanın "Brügge" komandasını qəbul edib. Görüş 1:1 hesablı heç-heçə ilə yekunlaşıb. "Cim-Bom" bu mövsüm qrup mərhələsində ilk qolunu vuraraq, uzatma dəqiqələrinədək öndə olduğu halda, qələbə hesabını qoruya bilməyib. 

Nəticədə "Brügge" bərabərliyi təmin edərək, 3-cü pillədə qalıb və İspaniya "Real Madrid"i Fransa PSJ-si ilə görüşə çıxmamış Çempionlar Liqasının 1/8 finalına vəsiqəni təmin edib. PSJ ilə qarşılaşmada isə "kral klubu" Kərim Benzemanın qolları ilə 2:0 hesabı ilə öndə olduğu halda, qələbəni qoruya bilməyib - 2:2. Nəticədə Fransa təmsilçisi qrup lideri, İspaniya komandası isə 2-ci pillənin sahibi kimi mərhələ adlayıb.

B qrupunda "Srvena Zvezda" növbəti mərhələni təmin etmiş Almaniya "Bavariya"sı ilə Serbiyada üz-üzə gəlib. Görüş qonaqların 6:0 hesablı qələbəsi ilə yekunlaşıb. Qollardan 4-nü Robert Levandovski vurub. Polşalı hücumçuya poker üçün cəmi 16 dəqiqə kifayət edib.

Joze Mourinyo "Tottenhem"in baş məşqçisi kimi Çempionlar Liqasındakı ilk oyununda Yunanıstan "Olimpiakos"unu İngiltərədə məğlub etməyi bacarıb. Qonaqlar oyunun əvvəllərində önə keçsələr də, londonlular dönüş etməyi bacarıblar. Nəticədə 4:2 hesabı ilə qalib gələn "Tottenhem" xallarını 10-a çatdırıb və "Bavariya" ilə birgə 1/8 finala çıxıb.

C qrupunda İngiltərənin digər təmsilçisi "Mançester Siti" Ukraynanın "Şaxtyor" (Donetsk) komandası ilə qarşılaşmada qələbəni əldən verərək, heç-heçə ilə kifayətlənsə də, mərhələ adlamağı bacarıb. İtaliya "Atalanta"sı isə Xorvatiyanın "Dinamo" (Zaqreb) komandasına qalib gələrək, mərhələ şanslarını qoruyub.

D qrupunda mərhələni hələ ötən tur təmin etmiş "Yuventus" İtaliyada İspaniya "Atletiko"suna qalib gəlməyi bacarıb - 1:0. Qrupun digər oyununda Almaniya "Bayer"i Rusiyanın paytaxtı Moskvada "Dinamo"nu yenərək, "Atletiko" ilə xal fərqini minimuma endirib. Bu nəticədən sonra "Lokomotiv" qrupda qalıb, 1/8 finala ikinci vəsiqənin taleyi isə son tura saxlanılıb.

Beləliklə, 1/8 finala yüksələnlərin sayı 6-ya çatıb. Bu turadək Fransanın PSJ, Almaniyanın "Bavariya" və İtaliyanın "Yuventus" klubları bu hüquqa yiyələnmişdi. Gecənin oyunlarından sonra siyahıya İspaniyanın "Real Madrid", eləcə də İngiltərənin "Tottenhem" və "Mançester Siti" komandaları da əlavə olunub.

Çempionlar Liqası

V tur

26 noyabr

A qrupu

21:55. "Qalatasaray" (Türkiyə) - "Brügge" (Belçika) - 1:1

Qollar: Adem Büyük, 11 - Krepin Diatta, 90+2

Qırmızı vərəqələr: Krepin Diatta, 90+3; Klinton Mata, 90+3 (hər ikisi "Brügge")

24:00. "Real Madrid" (İspaniya) - PSJ (Fransa) - 2:2

Qollar: Kərim Benzema, 17; 79 - Kilian Mbappe, 81. Pablo Sarabia, 83

Xal durumu: PSJ – 13, "Real Madrid" - 8, "Brügge" - 3, "Qalatasaray" - 2.

B qrupu

24:00. "Srvena Zvezda" (Serbiya) - "Bavariya" (Almaniya) - 0:6

Qollar: Leon Qoretska, 14; Robert Levandovski 53; 60; 64; 68. Korentin Tolisso, 90

24:00. "Tottenhem" (İngiltərə) - "Olimpiakos" (Yunanıstan) - 4:2

Qollar: Dele Alli, 45+1. Harri Keyn, 50; 77. Serj Oryo, 73 - Yusif əl-Ərəbi, 6. Ruben Semedo, 19

Xal durumu: "Bavariya" - 15, "Tottenhem" - 10, "Srvena Zvezda" - 3, "Olimpiakos" - 1.

C qrupu

24:00. "Mançester Siti" (İngiltərə) - "Şaxtyor" (Donetsk, Ukrayna) - 1:1

Qollar: İlkay Gündoğan, 56 - Manor Solomon, 69

24:00. "Atalanta" (İtaliya) - "Dinamo" (Zaqreb, Xorvatiya) - 2:0

Qollar: Luis Muriel, 27 (pen.). Alexandro Qomes, 47

Xal durumu: "Mançester Siti" - 11, "Şaxtyor" - 6, "Dinamo" - 5, "Atalanta" - 4.

D qrupu

21:55. "Lokomotiv" (Moskva, Rusiya) - "Bayer" (Leverkuzen, Almaniya) - 0:2

Qol: Rifat Jamaletdinov, 11 (öz qapısına). Sven Bender, 54

24:00. "Yuventus" (İtaliya) - "Atletiko" (Madrid, İspaniya) - 1:0

Qol: Paulo Dibala, 45+2

Xal durumu: "Yuventus" - 13, "Atletiko" - 7, "Bayer" - 6, "Lokomotiv" - 3.

---

***00:06

UEFA Çempionlar Liqasınınn qrup mərhələsində V tura start verilib.

"Report"un məlumatına görə, turun açılış oyunları Türkiyə və Rusiyada təşkil olunub. İstanbuldakı qarşılaşmada "Qalatasaray" Belçika "Brügge"si üzərində qələbəni uzatma dəqiqələrində qaçırıb. 11-ci dəqiqədə Adem Büyük hesabı açıb. Bu, "sarı-qırmızılar"ın cari mövsümdə ilk qolu olub. Lakin 90+2-ci dəqiqədə Krepin Diatta qonaqların bərabərlik qolunu vurub.

Bundan sonra Diatta və komanda yoldaşı Klinton Mata qol sevincini yolverilməz tərzdə qeyd etdikləri üçün ikinci sarı vərəqə alaraq, meydandan qovulublar. Lakin "Qalatasaray" 9 futbolçu ilə qalan "Brügge"yə qalan uzatma dəqiqələrində qol vura bilməyib.

Nəticədə Belçika təmsilçisi xallarını 3-ə çatdıraraq, 3-cü, Türkiyə komandası isə 2 xalla sonuncu pillədə qalıb. İspaniya "Real Madrid"i isə 1/8 finala vəsiqəni təmin edib. Hazırda 7 xalla 2-ci yerdə gedən "kral klubu" "Brügge" üçün də əlçatmaz olub. Daha əvvəl qrupdan növbəti mərhələyə Fransa PSJ-si yüksəlmişdi. Avropa Liqasına vəsiqə verən 3-cü yerin taleyi isə son turda həll olunacaq. "Qalatasaray" PSJ-nin qonağı olacaqsa, "Brügge" "Real Madrid"i qəbul edəcək.

D qrupunun qarşılaşmasında isə "Lokomotiv" Moskvada Almaniyanın "Bayer" komandasına 0:2 hesabı ilə uduzaraq, Avropa Liqası şansını da itirib. 11-ci dəqiqədə "dəmiryolçular"ın futbolçusu Rifat Jamaletdinov öz qapısına göndərib. 54-cü dəqiqədə isə Sven Bender son nöqtəni qoyub. Bu qələbə sayəsində "Bayer" qrupda 2-ci yer uğrunda mübarizə şansını qoruyub. Lakin hazırda davam edən görüşdə İspaniya "Atletiko"su İtaliyada "Yuventus"a qalib gəlsə, Almaniya komandası Çempionlar Liqasının 1/8 finalına vəsiqə şansını itirəcək.