Yuxarı
    Bağlamaq

    Bu gün Azərbaycan Premyer Liqasında XI turun ilk 3 oyunu keçiriləcək

    Qarşılaşmalar ilk pillələrdə yer alan komandaların iştirakı ilə baş tutacaq

    Bakı. 31 oktyabr. REPORT.AZ/ Bu gün futbol üzrə Azərbaycan Premyer Liqasında XI tura start veriləcək. "Report"un məlumatına görə, ilk oyun günündə 3 qarşılaşma baş tutacaq.

    Əvvəlcə "İnter" eyniadlı arenada "Zirə"ni sınağa çəkəcək. Hazırda "bankirlər" 18 xalla 3-cü, "qartallar" 17 xalla 4-cü pillədədir. Hər iki komanda ötən turu heç-heçə ilə başa vurub.

    Digər 2 matç noyabrın 5-də Avropa Liqasının qrup mərhələsində IV turun görüşlərinə çıxacaq "Qəbələ" və "Qarabağ"ın iştirakı ilə keçiriləcək. Son 2 turda qələbəyə həsrət qalan "qırmızı-qaralar" əvvəlki 4 turda məğlubiyyət üzü görməyən "Kəpəz"i qəbul edəcək. Əslində, bu oyun Gəncədə keçirilməli idi. Amma "Nizami Yurdu"nda yağışlarla əlaqədar ot örtüyünün sıradan çıxma təhlükəsi yerdəyişməyə səbəb olub. Növbəti 2 dövrədə ev sahibi "Kəpəz" sayılacaq.

    Premyer Liqanın lideri "Qarabağ" isə uğursuzluq zolağından çıxmağı bacaran AZAL-ı qəbul edəcək. Bu görüşdə "təyyarəçilər"in baş məşqçisi Tərlan Əhmədov vaxtilə futbolçu kimi şərəfini qoruduğu Ağdam komandasına rəqib olacaq.

    31 oktyabr (şənbə)

    16:00. "İnter” (Bakı) – "Zirə” (Bakı)

    Hakimlər: Fariz Yusifov, İsgəndər Əliyev, Coşqun Həsənov, Ömər Paşayev

    AFFA nümayəndəsi: Məmmədəli Məmmədov

    Hakim-inspektor: Məhəmməd Məmmədov

    Bakı, "İnter Arena”

    Əvvəlki qarşılaşma: 1 oyun, +0=1-0, top fərqi 0-0

    Paytaxt təmsilçiləri ikinci dəfə üz-üzə gələcək. Cari mövsümdə keçirilən ilk dueldə qol vurulmayıb.

    18:00. "Qəbələ” – "Kəpəz” (Gəncə)

    Hakimlər: Əliyar Ağayev, Zeynal Zeynalov, Knyaz Əmiraslanov, Elvin Əsgərov

    AFFA nümayəndəsi: Ramiz Abdullayev

    Hakim-inspektor: Murad Məmmədov

    Qəbələ şəhər stadionu

    Əvvəlki qarşılaşmalar: 9 oyun, +2=4-3, top fərqi 5-8

    İndiyədək səfərdə çıxış edən komanda qalib gəlməyib. Son 3 oyunda meydan sahibi qapısını toxunulmaz saxlayıb. Ardıcıl 5 matçda qonaq tərəf xal əldə edə bilməyib.

    19:00. "Qarabağ” (Ağdam) – AZAL (Bakı)

    Hakimlər: İnqilab Məmmədov, Rahil Ramazanov, Vüsal Qənbərov, Rəhim Həsənov

    AFFA nümayəndəsi: Mübariz Hüseynov

    Hakim-inspektor: Kərim Ağayev

    Bakı, Tofiq İsmayılov adına Suraxanı qəsəbə stadionu

    Əvvəlki qarşılaşmalar: 27 oyun, +16=6-5, top fərqi 36-24

    AZAL-la oyunlarda ardıcıl 7 qələbə qazanan “Qarabağ” 8 matçdır meydanı qolsuz tərk etmir. Ağdam təmsilçisi son 3 ev oyununda eyni – 2:1 hesabı ilə qalib gəlib. AZAL son 4 səfər matçında qol vurub.

    Qeyd edək ki, Milli Məclisə seçkilərlə əlaqədar noyabrın 1-də oyun keçirilməyəcək. Noyabrın 2-də isə "Sumqayıt" "Neftçi"ni, "Rəvan" "Xəzər Lənkəran"ı qəbul edəcək. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi