Avropa Komissiyası və UEFA birgə bəyannamə imzalayıb

Bakı. 29 noyabr. REPORT.AZ/ Belçikanın paytaxtı Brüsseldə Avropa Komissiyası və UEFA-nın təşkilatçılığı ilə "İdman qurumlarının Avropa Birliyi tərəfindən maliyyələşdirilməsi imkanları" mövzusunda seminar keçirilib.

"Report"un AFFA-nın rəsmi saytına istinadən verdiyi məlumata görə, seminar Avropa Kommissiyası, Avropa ölkələrinin hökumət üzvləri, UEFA və UEFA-ya üzv olan 55 milli assosiasiyasının nümayəndələrinin iştirakı ilə Regionlar üzrə Avropa Kommisiyasının baş ofisində təşkil olunub. AFFA-nın Marketinq və Sponsorluq şöbəsinin müdiri Tural Piriyev seminarda iştirak edib.

Regionlar üzrə Avropa Kommissiyasının prezidenti Karl-Haynts Lamberts açılış nitqi ilə çıxış edərək idmanın və xüsusən, futbolun Avropada inkişafın, sosial inklüzivlik və həmrəyliyin təbliği üçün çox böyük rolunun olduğunu və Avropa birliyinin idmanın və futbolun inkişafına yaxından dəstək olmasının vacibliyini qeyd edib.

Gün ərzində davam edən seminarda müxtəlif təqdimatlar edilib, qrup müzakirələri keçirilib. Avropa Birliyinin maliyyə alətləri, birbaşa investisiya və dəstək proqramları ətraflı müzakirə olunub, milli assosiasiyalar tərəfindən müxtəlif təkliflər irəli sürülüb.

Seminarın sonunda Regionlar üzrə Lamberts və UEFA-nın birinci vitse-prezidenti Karl-Erik Nilsson Avropa Komissiyası və UEFA-nın Avropada idmana birgə investisiyası ilə bağlı birgə bəyənnamə imzalayıb.