Yuxarı
    Bağlamaq

    AFFA İntizam Komitəsi növbəti cəzalarını açıqlayıb

    Meydana atılmış limon kənar əşya kimi dəyərləndirilib

    Bakı. 9 fevral. REPORT.AZ/ AFFA İntizam Komitəsi Azərbaycan Premyer Liqasında XX turun oyunlarında baş vermiş olaylarla bağlı qərarlarını açıqlayıb. "Report"un məlumatına görə, komitə turun 5 qarşılaşmasından 4-də hüquq pozuntusu aşkarlayıb.

    “Neftçi” ilə matçda 6 futbolçusu sarı vərəqə ilə cəzalandırıldığı üçün “Rəvan” klubu 1000 manat cərimələnib. "Sarı-qırmızılar" 89-cu dəqiqədə Həmid Yasinin kobud oyuna görə birbaşa qırmızı vərəqə alması səbəbindən daha 2000 manat ziyana düşüb, futbolçu isə 2 oyunluq cəzalanıb. 88-ci dəqiqədə “Neftçi”nin futbolçusu Jairo Rodriges ikinci sarı vərəqə alaraq meydandan kənarlaşdırıldığı üçün 1 oyunluq cəzalanıb, klub 200 manat cərimə olunub.

    “Qarabağ”la matçın 87-ci dəqiqəsində “Xəzər Lənkəran”ın futbolçusu Ruslan Cəfərov ikinci sarı vərəqə alaraq meydandan kənarlaşdırıldığı üçün 1 oyun cəzaya, klubu 200 manat cəriməyə məruz qalıb. 2-ci dəqiqədə “Qarabağ” azarkeşləri tərəfindən meydançaya atılan limon kənar əşya adlandırılıb və klub 2000 manat cərimələnib.

    “Zirə” ilə oyunun 61-ci dəqiqəsində “Sumqayıt”ın futbolçusu Emin Mehdiyev ikinci sarı vərəqə alaraq meydandan kənarlaşdırıldığı üçün 1 oyun cəzalanıb, klub 200 manat cərimə olunub.

    “Kəpəz”lə görüşün 88-ci dəqiqəsində AZAL-ın futbolçusu Taqim Novruzov ikinci sarı vərəqə alaraq meydandan kənarlaşdırıldığı üçün 1 oyunluq cəzaya, klubu 200 manat cəriməyə məruz qalıb.

    Qeyd edək ki, yalnız "İnter" - "Qəbələ" matçı cəzasız ötüşüb. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi