Uruqvaylı futbolçu Messinin tarixi rekordunu üstələdi

DÇ-2022-nin Cənubi Amerika üzrə seçmə mərhələsinin Çili yığmasına qarşı 1-ci turunun matçında hesabı açmış Uruqvay yığmasının 33 yaşlı hücumçusu Luis Suares statistik nailiyyət qazanıb.

"Report" xəbər verir ki, Luis Suares özünün 22-ci qolunu vurmaqla Cənubi Amerikanın dünya çempionatına seçmə matçlarının bütün tarixi ərzində ən yaxşı bombardir olub.

O, Argentina yığmasının hücumçusu Lionel Messini bu göstəricisi üzrə qabaqlayıb. Argentinalı futbolçunun aktivində 21 qol var.

Messi və Suares 2014-cü ildən 2020-ci ilə qədər "Barselona"nın heyətində oynayıblar. 33 yaşlı uruqvaylı hücumçu cari transferlə Madrid "Atletiko"suna keçib. O, keçmiş mövsümdə klub səviyyəsində bütün yarışlarda 36 matç keçirib, 21 qol vurub və 10 məhsuldar ötürmə edib.