“Səbail”in futbolçusu: “Argentina – Fransa finalı izləyəcəyik”

“Düşünürəm ki, Argentina – Fransa finalı izləyəcəyik və çempionu bu komandalar öz aralarında müəyyənləşdirəcəklər”.

Bunu “Report”a açıqlamasında “Səbail”in futbolçusu Emil Martinov Qətərdə keçirilən dünya çempionatının yarımfinal mərhələsindəki cütlükləri dəyərləndirərkən deyib.

Bolqarıstanlı yarımmüdafiəçi DÇ-2022-nin yarımfinalında bu gün Argentina ilə üz-üzə gələcək Xorvatiya millisini dəstəklədiyini bildirib. Ancaq o, həm xorvatların, həm də sabah digər yarımfinal cütündə Fransa ilə qarşılaşacaq Mərakeşin finala çıxacağına inanmır: “Qətərdəki dünya çempionatı çox maraqlı keçir. İstər qrupda, istərsə də ondan sonrakı mərhələlərdə gərgin oyunlar oldu. Gözəl turnir alınır. Balkan xarakterinə görə Xorvatiya yığmasını çox bəyənirəm. Ancaq nə onları, nə də Mərakeşi finalda görürəm”.

31 yaşlı orta sahə oyunçusu Azərbaycan kubokunun 1/4 final mərhələsinin ilk oyununda “Sabah” üzərində qazandıqları 3:2 hesablı qələbəni də dəyərləndirib. Martinov yarımfinala adlamaq şanslarını yüksək qiymətləndirib: “Sabah”la ilk oyunu çox yaxşı keçirdik. Üç qol vurduq, hətta daha çoxunu vura bilərdik. Bir neçə imkanı dəyərləndirə bilmədik. Təəssüf ki, son dəqiqələrdə qapımızdan iki top buraxdıq. Amma ümumilikdə uğurlu çıxış etdiyimizi düşünürəm. Ümumiyyətlə, matçlara qələbə üçün çıxırıq. Hər gün də oyunumuzu yaxşılaşdırmağa çalışırıq. Cavab qarşılaşmasında da ilk görüşdəki performansımızı davam etdirsək, yarımfinala vəsiqə qazanmaq şansımız yüksək olacaq”.

Bolqarıstanlı futbolçu hazırda Premyer Liqada 8-ci pillədə qərarlaşan komandasının cari mövsümdəki zəif çıxışını yayda heyətin tamamilə dəyişməsi ilə əlaqələndirib: “Yeni komandayıq, uyğunlaşmaq üçün zamana ehtiyacımız var. Ümumi nəticələr ürəkaçan görünməsə də, hər oyunda komandada irəliləyiş görürəm”.

Futbolçu bildirib ki, 2018-2019 mövsümündə heyətində Premyer Liqanın bürünc medalını qazandığı “Səbail”in hazırkı kollektivdən ciddi bir fərqi yoxdur: “Dörd il əvvəlki “Səbail”lə indikini müqayisə etmək çətindir. Düzdür, həmin vaxt komanda mövsümü üçüncü pillədə başa vurmuşdu. Amma məncə, səviyyə eynidir”.