"Real"ın müdafiəçisi Ferlan Mendi 5 aydan sonra məşqlərə başlayıb

İspaniyanın "Real" (Madrid) klubunun fransalı müdafiəçisi Ferlan Mendi uzun fasilədən sonra məşqlərə başlayıb.

"Report" "Marca" nəşrinə istinadən xəbər verir ki, 31 yaşlı futbolçunun bərpa prosesi təxminən 5 ay çəkib.

F.Mendi mayın 3-də İspaniya La Liqasında "Espanyol"la matçda sağ budunun vətərini zədələdikdən sonra meydana çıxmayıb. O, zədələndikdən bir həftə sonra əməliyyat olunub.

Müdafiəçinin hələ rəsmi matçlarda iştirak etməyə hazır olmadığı bildirilib. Onun komandaya tam qayıtması üçün fiziki formasını bərpa etməsi və klub həkimlərindən yekun tibbi icazə almasının tələb olunduğu qeyd edilib.