"Qarabağ"ın Çempionlar Liqasındakı oyununun stadionu dəyişdirilə bilər

"Qarabağ" komandası UEFA Çempionlar Liqasının II təsnifat mərhələsindəki rəqibini “Azersun Arena”da qəbul edə bilər. 

"Report"un məlumatına görə, bu barədə Ağdam təmsilçisinin baş məşqçisi Qurban Qurbanov I təsnifat mərhələsində Şimali Makedoniya "Sileks"ini 4:0 hesabı ilə məğlub etdikləri matçdan sonra mətbuat konfransında bildirib. 

48 yaşlı mütəxəssis deyib ki, Tofiq Bəhramov adına Respublika stadionunun ot örtüyünün durumunu nəzərə alaraq, "Sileks"lə qarşılaşmadan öncə də UEFA-ya müvafiq xahişlə müraciət etsələr də, istəkləri qəbul olunmayıb: "İcazə versələr, növbəti görüşü “Azersun Arena”da keçirə bilərik. Bəlkə 10-15 gündən sonra Respublika stadionunun ot örtüyü düzələcək. Amma yenə də biz müraciətimizi etmişik".

Qeyd edək ki, "Qarabağ" II təsnifat mərhələsində "Şerif" (Moldova) - "Fola Eş" (Lüksemburq) cütünün qalibi ilə qarşılaşacaq. Bu raundun görüşləri 25-26 avqustda keçiriləcək. "Sileks" isə mübarizəyə UEFA Avropa Liqasının II təsnifat mərhələsində davam edəcək. "Qarabağ"ın əsas komandası indiyədək "Azersun Arena"da beynəlxalq oyun keçirməyib.