Azərbaycanın üç qadın güləşçisi Avropa çempionatında bürünc medal görüşünə çıxacaq

Azərbaycanın üç qadın güləşçisi Rumıniyanın paytaxtı Buxarestdə keçirilən Avropa çempionatında bürünc medal görüşünə çıxacaq.

"Report"un məlumatına görə, bunlar Türkan Nəsirova (50 kq), Elmira Qəmbərova (59 kq) və İrina Netrebadır (68 kq).

İ.Netreba yarımfinalda Ukrayna təmsilçisi Alla Çerkasovaya uduzub. T.Nəsirova ilə E.Qəmbərova 1/4-də müvafiq olaraq ukraynalı Oksana Livaç və rusiyalı Svetlana Lipatovaya məğlub olsalar da, rəqibləri finala çıxdığı üçün medal görüşünə çıxacaqlar. 

Sabirə Əliyeva (76 kq) isə 1/4 finalda məğlub olaraq mübarizəni dayandırıb.

T.Nəsirova bürünc medal uğrunda görüşdə türkiyəli Evin Demirhanla, E.Qəmbərova ukraynalı Angelina Lisakla, İ.Netreba isə Aqnieşka Kordus (Polşa) - Anna Fransson (İsveç) cütünün qalibi ilə üz-üzə gələcək.

Qeyd edək ki, qadınların mübarizəsində medal görüşləri sabah keçiriləcək.