"Zirə" Konfrans Liqasında mübarizəni dayandırıb

"Zirə" UEFA Konfrans Liqasının II təsnifat mərhələsində cavab görüşünə çıxıb.

"Report"un məlumatına görə, Rəşad Sadıqovun baş məşqçi olduğu komanda İsraildə "Makkabi" (Təl-Əviv) klubu ilə qarşılaşıb. Təl-Əvivdəki "Blumfild" stadionunda oynanılan qarşılaşma qolsuz heç-heçə ilə başa çatıb.

Oyuna yaxşı başlayan "qartallar" bir neçə epizodda rəqibə təhlükə yaşadıb. Əvvəlcə Rüstəm Əhmədzadə əlverişli fürsəti əldən verib. Az sonra Hamidu Keyta 2 müdafiəçini keçib qapı istiqamətində zərbə endirsə də, top dirəyin üstündən keçib. Ardınca isə Coşqun Diniyevin uzaq məsafədən qüvvətili zərbəsində azacıq dəqiqlik çatmayıb. Hissənin sonlarına doğru fəallığı artıran meydan sahibləri Brendli Kuvasla qola yaxın olsa da, müdafiəçilər təhlükəni sovuşdura biliblər.

İkinci yarı da qarşılıqlı hücumlarla başlayıb. 50-ci dəqiqədə Əhmədzadənin başla vurduğu top qapının üstündən keçib. 7 dəqiqə sonra Kuvas Mehdi Cənnətovla üzbəüz qalsa da, qolkiper qola imkan verməyib. 74-cü dəqiqədə Azərbaycan millisinin qapıçısı növbəti dəfə komandasını qoldan xilas edib. "Makkabi" son dəqiqələrdə təzyiqi artırsa da, oyunda qol vurulmayıb.

Beləliklə, "Zirə" Bakıdakı ilk matçda rəqibinə 0:3 hesabı ilə uduzduğundan Konfrans Liqasında mübarizəni dayandırıb.

İsraildə "Makkabi" (Təl-Əviv) və "Zirə" arasında keçirilən UEFA Konfrans Liqasının II təsnifat mərhələsinin cavab oyununda ikinci hissə başlayıb.

"Report"un məlumatına görə, birinci yarıdan sonra qarşılaşmada hesab açılmayıb.

İsraildə "Makkabi" (Təl-Əviv) və "Zirə" arasında keçirilən UEFA Konfrans Liqasının II təsnifat mərhələsinin cavab oyununda ilk hissə başa çatıb.

"Report"un məlumatına görə, komandalar fasiləyə qolsuz heç-heçə ilə yollanıblar.

İsraildə "Makkabi" (Təl-Əviv) və "Zirə" arasında keçirilən UEFA Konfrans Liqasının II təsnifat mərhələsinin cavab oyunu başlayıb.

"Report"un məlumatına görə, Təl-Əvivdəki "Blumfild" stadionunda oynanılan qarşılaşma Bakı vaxtı ilə saat 21:30-da start götürüb.

Matçı xorvatiyalı FIFA referisi Mario Zebets idarə edir.

Qeyd edək ki, Bakıdakı ilk görüşdə "qartallar" rəqibinə 0:3 hesabı ilə uduzub.