İngiltərə Premyer Liqası: “Tottenhem” “Mançester Siti” ilə xallarını bərabərləşdirib

İngiltərə Premyer Liqasının 17-ci turunun ilk matçında “Nottingem Forest” “Tottenhem”i qəbul edib.

“Report” xəbər verir ki, “Siti Qraund”da baş tutan oyunda qonaqlar qalib gəlib.

Gərgin keçən qarşılaşmada hesab birinci hissəyə əlavə edilmiş ikinci dəqiqədə açılıb. Braziliyalı Rişarlison Deyan Kulusevskinin ötürməsindən sonra topu tora qovuşdurub. 58-ci dəqiqədə meydan sahibləri Antoni Elanqanın sayəsində hesabı bərabərləşdirsə də, oyunun baş hakimi Carred Cillet VAR-a baxdıqdan sonra ofsayd qeydə alıb və qolu ləğv edib. Cəmi 12 dəqiqə sonra “mahmızlar” fərqi artırıblar: isveçli yarımmüdafiəçi Kulusevski qola imza atıb.

"Meşəçilər"in səylərinə baxmayaraq, matçda hesab dəyişməyib.

Beləliklə, 17 oyundan sonra “Totttenhem” 33 xalla 5-ci pillədəki yerini bərkidib və xal sayına görə “Mançester Siti”yə çatıb. “Nottingem Forest” isə 16-cı pillədə qalsa da, qarşıdakı günlərdə “Everton”un mümkün qələbəsi səbəbindən bir pillə aşağı düşə bilər. Çempionatın lideri “Liverpul”dur. “Qırmızılar”ın 37 xalı var. Yurgen Kloppun yetirmələrinin ən yaxın təqibçiləri “Arsenal” (36 xal) və “Aston Villa”dır (35 xal).