Dünya çempionu Fransa klubundan təzminat tələb edir

"Lion"un sabiq baş məşqçisi Fabio Qrosso Fransa klubundan təzminat tələb edir.

"Report" "Corriere dello Sport"a istinadən xəbər verir ki, 46 yaşlı mütəxəssis komandadan qovulduğu üçün imicinə və nüfuzuna xələl gətirildiyini düşünür.

İtaliyalı baş məşqçi Liqa 1 təmsilçisindən 1,5-2 milyon avro istəyir. O, güzəştə getmək fikrində deyil.

Qeyd edək ki, sentyabrın 16-da "Lion"un "sükanı arxasına" keçən Qrossonun müqaviləsi noyabrın 30-da ləğv edilib. Onun sözləşmə müddəti 2024-cü ilin yayına qədər nəzərdə tutulmuşdu.

Xatırladaq ki, 2007-2009-cu illərdə bu klubun formasını geyinmiş sabiq müdafiəçi 2006-cı ildə İtaliya millisinin heyətində dünya çempionatının qalibi olub.