"Klub 2017-ci ildəki kimi qrup mərhələsinə vəsiqə qazanacaq. Onlar bunu bacaracaqlar".
Bunu "Report"a açıqlamasında "Qarabağ"ın sabiq futbolçusu Donald Gerye Bakıda Çexiyanın "Viktoriya" (Plzen) komandasına qarşı keçirəcəkləri UEFA Çempionlar Liqasının pley-off mərhələsinin oyunları barədə danışarkən deyib.
Hazırda Kiprin "Olimpiakos" (Nikosiya) klubunda çıxış edən 33 yaşlı oyunçu "köhlən atlar"ın avrokuboklardakı əvvəlki matçlarının hamısını izlədiyini bildirib.
Gerye 2017-ci ildə eyni turnirdə Danimarka "Kopenhagen"inə qalib gəldikləri pley-off görüşünü də xatırlayıb: "Həmin anları unutmaq olmaz. Bu, futbolçular, Azərbaycan xalqı və xüsusən də qarabağlılar üçün xüsusi gün idi".
Qeyd edək ki, bu gün keçiriləcək "Qarabağ" – "Viktoriya" matçı saat 20:45-də başlayacaq. Cavab görüşü avqustun 23-də Plzendə olacaq.