Azərbaycan Premyer Liqasında 2018/2019 mövsümünün tamaşaçı rekordu qeydə alınıb

Bakı. 27 avqust. REPORT.AZ/ Futbol üzrə Azərbaycan Premyer Liqasında 2018/19 mövsümünün tamaşaçı rekordu qeydə alınıb.

“Report” Peşəkar Futbol Liqasının saytına istinadən xəbər verir ki, III turun “Qarabağ” – “Neftçi” qarşılaşması (1:1) tamaşaçı sayında mövsümün arxada qalan hissəsi üçün ən yüksək göstərici ilə diqqət çəkib.

“Azersun Arena”da keçirilən matçı 3000 nəfər izləyib. İlk iki turda rekord “Səbail” – “Qarabağ” görüşünə (0:2) məxsus idi. “Bayıl Arena”dakı görüşü Azərbaycan derbisindən, təxminən, 3 dəfə az – 1050 tamaşaçı izləmişdi.

Qeyd edək ki, arxada qalan 3 turun 11 oyununu, ümumilikdə, 8700 tamaşaçı izləyib. Bunun da yarıdan çoxu – 4450-si hesabat turunda qeydə alınıb.