Azərbaycan millisinin futbolçusu: "Radomyak"a transferimi karyeram üçün xeyirli hesab edirəm

"Radomyak"a transferimi karyeram üçün xeyirli hesab edirəm.

Bunu "Report"a açıqlamasında Polşanın "Radomyak" komandasına transfer olunan Rahil Məmmədov deyib.

Yeni klubuna keçidi barədə danışan Azərbaycan millisinin müdafiəçisi seçiminin doğru olduğunu söyləyib:

"Radomyak" daha yaxşı seçim oldu. Düşünürəm ki, həm şərait, həm də peşəkarlıq baxımından başqa seçimlərdən daha üstündür. Eyni zamanda, komandanın Polşa Ekstraklasası təcrübəsi də böyükdür. Bu transferi karyeram üçün xeyirli hesab edirəm. İnşallah, qarşıdakı 2 il mənim üçün uğurlu olar".

Qeyd edək ki, peşəkar karyerasına "Neftçi" klubunda başlayan 28 yaşlı futbolçu Azərbaycanda "Səbail", "Qarabağ" və "Zirə" klublarının şərəfini qoruyub. O, son olaraq Polşanın LKS klubunda çıxış edib.