Hindistan güləşçilərinin Bakıdakı toplanışı yarımçıq dayandırıldı

Yunan-Roma güləşi üzrə Hindistan millisinin Bakıdakı təlim-məşq toplanışı yarımçıq dayandırılıb.

"Report"un məlumatına görə, ölkənin Səhiyyə və Ailə Rifahı Nazirliyi koronavirusla bağlı vəziyyəti nəzərə alaraq yığmanı hazırlıq prosesinin müddətini azaltmağa məcbur edib.

Vəziyyəti nəzərə alan Hindistan Güləş Federasiyası (WFI) idmançıların evlərinə təhlükəsiz qayıtmalarını təmin etmək üçün ölkənin Bakıdakı səfirliyi ilə əlaqə saxlayıb. Hindistan yığması martın 16-da axşam saatlarında öz ölkəsinə yola düşüb.

Qeyd edək ki, martın 4-dən Bakıda Azərbaycan millisi ilə birgə toplanışda olan komandanın hazırlıq prosesi martın 21-dək nəzərdə tutulmuşdu.