EYOF: Azərbaycan cüdoçusu finala yüksəlib - YENİLƏNİB

Azərbaycan cüdoçusu Hüseyn Məmmədov Bakıda keçirilən XV Avropa Gənclər Yay Olimpiya Festivalında (EYOF) finala yüksəlib. 

"Report"un məlumatına görə, 90 kq-dan yuxarı çəki dərəcəsində mübarizə aparan idmançı yarımfinalda moldovalı Alin Baqrini ipponla məğlub edib. O, qızıl medal uğrunda görüşdə Axmed Maqomadov (Rusiya) - Jan Karletti (İtaliya) cütünün qalibi ilə üz-üzə gələcək. 

81 kq-da yarışan Məhərrəm İmamverdiyev təsəlliverici görüşlərdə qələbə qazanıb. O, bürünc medal uğrunda görüşdə israilli İftaç Badaşla görüşəcək.

Qadın cüdoçu, 70 kq-da yer alan Nərmin Əmirli təsəlliverici görüşdə rusiyalı Yelizaveta Postnikovaya uduzaraq medal şansından məhrum olub.

*** 12:53

Azərbaycan cüdoçusu Hüseyn Məmmədov Bakıda keçirilən XV Avropa Gənclər Yay Olimpiya Festivalında (EYOF) yarımfinala yüksəlib.

"Report"un məlumatına görə, 90 kq-dan yuxarı çəki dərəcəsində mübarizə aparan idmançı ilk iki cəhdində ardıcıl olaraq Almaniya və Yunanıstan təmsilçilərini məğlubiyyətə uğradıb. Məmmədov finala gedən yolda Rumıniyalı Alin Baqrinin müqavimətini qırmağa çalışacaq.

90 kq-da çıxış edən Ruslan Nəsirli ilk görüşdə Bolqarıstan idmançısına uduzaraq çıxışını başa vurub. 81 kq-dakı Məhərrəm İmamverdiyev ilk cəhddə rumıniyalı həmkarını sıradan çıxarıb. Daha sonra o, Ukrayna təmsilçisinə uduzaraq təsəlliverici görüşlərdə iştirak hüququ qazanıb.

Qadın cüdoçu Nərmin Əmirli Yael hollandiyalı Van Hemstlə bacarmayıb. 70 kq-da mübarizə aparan idmançı təsəlliverici görüşlərə qatılacaq.

Qeyd edək ki, Azərbaycan cüdoçuları əvvəlki iki gündə 1 qızıl, 1 gümüş və 2 bürünc medal əldə ediblər.