Dünya rekordu müəyyənləşdirmək istəyən pilot qəzada ölüb

Qadınlar arasında reaktiv avtomobillə yeni dünya rekordu müəyyənləşdirmək istəyən amerikalı pilot Cessi Kombs qəzaya düşərək həlak olub.

“Report” “Autoblog”a istinadən xəbər verir ki, 36 yaşlı sürücü Oreqon ştatı ərazisindəki Alvorda səhrasında 4 təkərli reaktiv avtomobillə özünə məxsus rekordu yeniləmək istəyərkən ölüb.

2013-cü ildə 632 km/saat göstərici ilə qadınlar arasında 48 illik rekordu qıran Kombs 3 il sonra 769 km/saat nəticəyə imza atıb. O, bu dəfə 996 km/saat hədəfləsə də, qəzaya düşüb.

İdmançının ailəsi bildirib ki, Kombs 1976-cı ildə Kitti O Nilin qadınlar arasında müəyyənləşdirdiyi ən böyük sürət həddini - 843 km/saat rekordunu qırmaq istəyib.