Azərbaycan gimnastları Portuqaliyada 4-cü qızıl medalı əldə ediblər

Azərbaycan idmançıları Portuqaliyanın Qimarayeş şəhərində keçirilən akrobatika gimnastikası üzrə dünya çempionatında 4-cü qızıl medalı hesabına yazdırıblar.

"Report" xəbər verir ki, Raziyə Seyidli və Ağasif Rəhimovdan ibarət qarışıq cütlük yüksək nəticə göstərərək qarışıq hərəkətlərdə fəxri kürsünün ən yüksək pilləsinə qalxıb.

Qeyd edək ki, təmsilçilərimiz daha əvvəl qarışıq cütlük üzrə balans hərəkətlərində bütün rəqiblərini üstələməyi bacarmışdı. Kişilərdən ibarət Murad Rəfiyev - Daniel Abbasov cütlüyü həm balans, həm də qarışıq hərəkətlərdə dünya çempionu olmuşdular.