Azərbaycan gimnastı Bakıdakı Dünya Kubokunda finala vəsiqə qazanıb

Azərbaycan gimnastı Zöhrə Ağamirova Bakıda keçirilən bədii gimnastika üzrə Dünya Kubokunda finala yüksəlib.

"Report"un məlumatına görə, idmançı halqa ilə hərəkətlərdə 19.800 xal toplayıb.

Ağamirova bu nəticə ilə 7-ci yeri tutaraq finala vəsiqə qazanıb. O, topla hərəkətlərdə isə 18.250 xallıq nəticə göstərib.

Fərdi proqramda çıxış edən digər Azərbaycan gimnastı Veronika Hudis topla 17.650, halqa ilə hərəkətlərdə isə 15.650 xal yığaraq təsnifat mərhələsində mübarizəni dayandırıb.

Hazırda qrup hərəkətləri üzrə təsnifat yarışları keçirilir. Qrup hərəkətləri üzrə mübarizədə isə xalça üzərinə Ayna Cəfərova, Simarə Cəfərova, Güllü Ağalarzadə, Narın Qurbanova, Nərmin Cahangirova və Sona Rəhmanova çıxacaq.