Azərbaycan cüdoçuları Tbilisi Qran-prisində mübarizəyə başlayırlar

Bakı. 30 mart. REPORT.AZ/ Bu gün Gürcüstanın paytaxtı Tbilisidə cüdo üzrə Qran-priyə start veriləcək.

"Report"un məlumatına görə, üç gün davam edəcək yarışda Azərbaycanı 8 kişi cüdoçu təmsil edəcək. İlk yarış günündə onlardan 3-ü tatamiyə çıxacaq və hər biri mübarizəyə 1/16 final mərhələsindən başlayacaq.

60 kq çəki dərəcəsində Sadiq Məhərrəmov ilk görüşünü rusiyalı Albert Monquşa, Oruc Vəlizadə braziliyalı İtalo Karvalyoya qarşı keçirəcək.

66 kq çəkidəki Elçin Hüseynov isə hollandiyalı Mattheys van Hartenlə üz-üzə gələcək.

Qeyd edək ki, martın 31-də Paşa Əliyev, Telman Vəliyev (hər ikisi 73 kq) və Coşqun Abdullayev (81 kq), aprelin 1-də isə Sənan Əhmədov (100 kq) və Cəlil Şükürov (+100 kq) mübarizə aparacaq. Qran Pridə 38 ölkədən 183-ü kişi, 119-u qadın olmaqla, cəmi 302 cüdoçu mübarizə aparacaq.