Rusiya qazının Ukrayna vasitəsilə ixrac həcmi gündəlik 100 milyon kubmetri ötüb

Ukrayna ərazisindən Rusiya qazının ixrac həcmləri əvvəlki günlə müqayisədə 19% artaraq, gündəlik 100 milyon kubmetri ötüb.

“Report” xəbər verir ki, bu barədə “Ukrayna QTS operatoru” şirkəti məlumat yayıb.

Bu, uzunmüddətli müqavilə əsasında bron edilmiş həcmə (gündəlik, təxminən, 109,5 milyon kubmetr) yaxındır.

Bu gün üçün Ukraynanın qaz ötürülməsi sistemi vasitəsilə Rusiya qazının ixracı ilə bağlı ilkin nominasiya 107,7 milyon kubmetr olub.

“Şimal axını” ilə qaz tədarükü üçün sifariş, təxminən, gündəlik 170 milyon kubmetr səviyyəsində qalıb.

Son günlərdə Ukrayna ətrafında vəziyyətin kəskinləşməsi səbəbindən qazın spot qiymətlərinin artması fonunda Avropa anbarlarından qazın çıxarılması həcmləri artırılıb.