Bakı. 2 mart. REPORT.AZ/ Gürcüstanın energetika və su təchizatı üzrə Milli Tənzimləyici Komissiyası ölkədə təbii qazın yeni tarifləri ilə bağlı iyulun 20-dək yekun qərar verəcək.
“Report” “Sputnik” agentliyinə istinadən xəbər verir ki, Komissiya martın 31-dək yeni qaz tarifləri ilə bağlı təklifləri qəbul edəcək.
Komissiyanın üzvlərindən biri - Qoça Şoniya daha əvvəl təbii qaz tarifinin artımını istisna etməyib. O bildirib ki, müraciətlərə baxıldıqdan sonra hər şey aydınlaşacaq.
“SOCAR Georgia Gas” və “Sakorqqaz” Komissiyaya təbii qazın nəqli, paylanması, ötürülməsi və istehlakının tarifləri ilə bağlı müraciət edib.
Məsələyə ilk olaraq martın 1-də baxılıb. Komissiya maraqlı şirkətlərə təkliflərini təqdim etmək üçün martın 31-dək vaxt verməyi qərarlaşdırıb.
Bundan başqa, qazın tarifinə baxılması üçün “KazTransQaz-Tbilisi” bu həftə müraciət ünvanlayıb. Komissiyadan bildirilib ki, bu məsələ ilə bağlı ictimai-inzibati baxış hələ başlamayıb.