Azərbaycan Rumıniyaya neft ixracını 3 dəfə, qazancını 6,2 dəfə artırıb

Bu ilin yanvar-iyul aylarında Azərbaycandan Rumıniyaya 260 min 163,26 ton xam neft ixrac edilib.

“Report”un Dövlət Gömrük Komitəsinə istinadən verdiyi xəbərə görə, bu miqdarda məhsulun dəyəri 189 milyon 579,67 min ABŞ dolları təşkil edib.

Bu ilin yanvar-iyul aylarında Azərbaycandan Rumıniyaya ixrac olunmuş məhsulun miqdarı 2021-ci ilin eyni dövrü ilə müqayisədə 3,07 dəfə, dəyəri isə 6,2 dəfə çoxdur.

Azərbaycandan Rumıniyaya ixrac edilən xam neftin ümumi neft ixracında payı 1,58 % olub.

Xatırladaq ki, bu ilin yanvar-iyul ayları ərzində Azərbaycan gömrük bəyannamələrinə əsasən, 16 milyon 414 min 905 ton həcmində bitumlu süxurlardan alınmış xam neft və xam neft məhsulları ixrac edib. Bu miqdarda məhsulun dəyəri 12 milyard 397 milyon 710 min ABŞ dolları təşkil edib.

Bu ilin yanvar-iyul aylarında Azərbaycan xarici ölkələrlə 30 milyard 59 milyon ABŞ dolları dəyərində ticarət əməliyyatı aparıb. Ötən 7 ayda xarici ticarət dövriyyəsinin 22 milyard 565 milyon ABŞ dolları ixracın, 7 milyard 494 milyon ABŞ dolları isə idxalın payına düşüb.