Azərbaycan ötən il Fransaya neft ixracını 23 %-dən çox azaldıb

Ötən il Azərbaycan Fransaya 152 min 571,03 ton xam neft ixrac edib.

“Report”un Dövlət Gömrük Komitəsinə istinadən verdiyi xəbərə görə, bu miqdarda məhsulun dəyəri 88 milyon 203,85 min ABŞ dolları təşkil edib.

Azərbaycandan Fransaya ixrac olunmuş məhsulun miqdarı 2023-cü illə müqayisədə 23,3 %, dəyəri isə 25,6 % azdır.

Fransaya ixrac edilən xam neftin Azərbaycanın ümumi neft ixracında payı 0,65 % olub.

Gömrük bəyannamələrinə əsasən, 2024-cü ildə Azərbaycan 14 milyard 437 milyon 355,99 min ABŞ dolları dəyərində 23 milyon 596 min 132,23 ton həcmində bitumlu süxurlardan alınmış xam neft və neft məhsulları ixrac edib.

Hesabat ilində Azərbaycan xarici ölkələrlə 47 milyard 612,1 milyon ABŞ dolları dəyərində ticarət əməliyyatı aparıb. Xarici ticarət dövriyyəsinin 26 milyard 554,1 milyon ABŞ dolları ixracın, 21 milyard 58 milyon ABŞ dolları isə idxalın payına düşüb.