Aİ komissarı alternativ enerji məqsədlərinə birgə nail olmaq üçün hədəfləri açıqlayıb

Bərpa olunan enerji hədəflərini konkret layihələrə çevirmək, buna hər bir qitədə, hər bir iqtisadiyyatda nail olmaq üçün birlikdə üç sahə üzrə irəliləyiş əldə etmək olar.

"Report" xəbər verir ki, bunu Avropa İttifaqının (Aİ) iqlim fəaliyyəti üzrə komissarı Vopke Hoekstra BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası çərçivəsində keçirilən "Nazirlər səviyyəsində dialoq: Bərpa olunan enerjidən istifadənin üç dəfə və enerji səmərəliliyinin iki dəfə artırılması üçün investisiyaların genişləndirilməsi" adlı tədbirdə deyib.

O bildirib ki, ilk növbədə enerji şəbəkələrinə diqqət yetirilməlidir: "Bərpa olunan enerjinin üçqat artırılması və dünyanın elektrikləşdirilməsi enerji şəbəkəsinin həqiqətən əhəmiyyətli təkmilləşdirilməsini tələb edir. Beynəlxalq Enerji Agentliyinin hesablamalarına görə, bu onilliyin sonuna qədər 25 milyon kilometr yeni və təkmilləşdirilmiş şəbəkə xətlərinə ehtiyac olacaq".

Aİ komissarı qeyd edib ki, ikinci məsələ minerallarla bağlıdır: "Litium, kobalt və nadir torpaq elementləri batareyaların, günəş panellərinin əsasını təşkil edir. Bu minerallara qlobal tələbatın 2030-cu ilə qədər üç dəfə, bəziləri üçün (məsələn, litium) 2040-cı ilə qədər 44 dəfə artacağı proqnozlaşdırılır. Bu ehtiyatların hasilatı və emalı davamlı olmalıdır. Avropa olaraq bu məsələdə yüksək standartlar müəyyən etmək əzmindəyik. Məsələn, biz dünya üzrə 170 layihə müraciəti almışıq. Ancaq yalnız ekoloji və sosial standartlarımıza cavab verən layihələri dəstəkləyəcəyik. Bu yolla biz minerallar istehsal edən ölkələrə və onların xalqlarına öz torpaqlarının sərvətlərindən bəhrələnmək üçün real imkan yaradırıq".

Son sahəyə toxunan Vopke Hoekstra diqqətə çatdırıb ki, qeyd edilən bütün məsələlərin həyata keçirilməsi üçün investisiya lazımdır: "Avropa iqlim maliyyəsi təminatçısı kimi liderlik edir və biz hər il 31 milyard ABŞ dolları dövlət maliyyəsi təqdim edirik. Bununla belə, təkcə dövlət maliyyələşdirməsi kifayət deyil. Özəl sektor da bu istiqamətdə addımlar atmalı, keçidin aktuallığına uyğunlaşmalıdır. Hazırda 760 milyon insanın elektrik enerjisinə çıxışı yoxdur və onların əksəriyyəti böyük təmiz enerji potensialına malik olan Sub-Sahara Afrikasında yaşayır. Onları dəstəkləmək, kapital xərclərini azaltmaq və qlobal enerji keçidinin hər yerə yayılmasına şərait yaratmaq bizim kollektiv borcumuzdur. Gələn həftə G20 liderlərinin sammitində bu məsələ ilə bağlı yeni təşəbbüs elan ediləcək".