Yuxarı

TQDK daxili işlər orqanlarında işləmək istəyənlər üçün test imtahanı keçirəcək

Test imtahanında 65 və daha çox bal toplayan namizədlər müsabiqənin yekun mərhələsinə buraxılırlar

Bakı. 26 fevral. REPORT.AZ/ Tələbə Qəbulu üzrə Dövlət Komissiyası (TQDK) martın 1-də daxili işlər orqanlarında vakant vəzifələrə qəbul olunmaq istəyən namizədlər üçün test imtahanı keçirəcək. Bu barədə "Report"a TQDK-dan məlumat verilib.

İmtahan saat 11:00-da Bakı Qızlar Universitetinin binasında (ünvan: M.Sənani küçəsi, 14) təşkil olunacaq və 3 saat ərzində aparılacaq.

Sənədlərin qəbulu 2014-cü il noyabrın 24-dən dekabrın 24-dək Daxili İşlər Nazirliyi tərəfindən aparılıb. Müsabiqədə iştirak etmək üçün 207 nəfərin namizədliyi qeydə alınıb. Onlardan 124 nəfəri pedaqoji, 83 nəfəri isə hüquq istiqaməti üzrə sənəd verib.

Namizədlərə test imtahanında iştirak etmək üçün "İmtahana buraxılış vəsiqəsi" və "Yaddaş kitabçası" fevralın 24-dən təqdim olunur.

İmtahanda namizədlərə 100 sualdan ibarət test kitabçası təqdim olunur. Onlardan 80 sual qanunvericilik, 20 sual məntiqi nəticə çıxarma qabiliyyətini müəyyən edən test tapşırığıdır. Pedaqoji istiqamət üzrə imtahan verən namizədlərə isə 30 sual qanunvericilik, 30 sual pedaqogika, 20 sual psixologiya, 20 sual məntiqi nəticə çıxarma qabiliyyətini müəyyən edən testlərdir.

Hər düzgün cavab 1 balla qiymətləndirilir. Test imtahanında 65 və daha çox bal toplayan namizədlər müsabiqənin yekun mərhələsinə - müsahibəyə buraxılırlar.   

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi