Yuxarı

Müəllimlərin iş yerini dəyişməsi üzrə keçirilən imtahanların nəticələri açıqlanıb

Əsasən ingilis dili, coğrafiya müəllimləri imtahanda yüksək nəticə göstəriblər

Bakı. 23 iyun. REPORT.AZ/ Azərbaycanın ümumi təhsil müəssisələrində və peşə liseylərində müddətsiz müqavilə ilə işləyən müəllimlərin iş yerinin bir rayon və şəhərdən digərinə dəyişdirilməsi üzrə müsabiqə çərçivəsində keçirilən imtahanların nəticələri bəlli olub.

Təhsil Nazirliyindən “Report”a verilən xəbərə görə, müsabiqədə elektron ərizəsi təsdiqlənən 2107 nəfərdən 1621 nəfəri (76,93 faiz) iştirak edib. İştirakçılardan 345 nəfəri müsahibə mərhələsinə keçib.

Nazirlikdən bildirilib ki, müsabiqənin nəticələri barədə məlumatlar hər bir namizədin şəxsi səhifəsində yerləşdirilib.

Namizədlərə ixtisaslarına uyğun olaraq, ümumi təhsil məktəblərinin fənn proqramının məzmunu üzrə 40, metodika və təlim strategiyaları üzrə 10, məntiq üzrə 10 sual olmaqla, ümumilikdə 60 sual təqdim edilib.

Məlumata görə, əsasən ingilis dili, coğrafiya müəllimləri imtahanda yüksək nəticə göstəriblər. Sözügedən müsabiqənin test mərhələsində keçid balını toplaya bilməyən müəllimlərin əksəriyyəti isə texnologiya, musiqi və fiziki tərbiyə müəllimləri olub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi