Dövlət qulluğuna qəbul üzrə imtahanın statistik göstəriciləri açıqlanıb

Bakı. 18 dekabr. REPORT.AZ/ Dövlət İmtahan Mərkəzi (DİM) tərəfindən dekabrın 17-də icraçı vəzifələrə (B növü) aid olan vəzifə qrupları üzrə keçirilən imtahanda iştirak etmiş namizədlərin yaş kateqoriyası və gender aspektləri haqqında statistik göstəricilər açıqlanıb.

DİM-in mətbuat xidmətindən "Report"a verilən məlumata görə, dövlət qulluğunda inzibati vəzifələrin B növünə (inzibati icraçı vəzifələr) aid olan BA və BB qruplarına uyğun olan vəzifələr üzrə keçirilən imtahanda iştirak etmək üçün qeydiyyatdan keçmiş 3040 namizəddən 990 nəfəri (32.6%) müvəffəqiyyət əldə edib.

Qeydiyyatdan keçən namizədlərin 1887 nəfəri kişi, 1153 nəfəri isə qadın olub. Qeydiyyatdan keçən namizədləri 5 yaş intervalı üzrə kateqoriyalara bölsək, kişilər üzrə ən çox namizəd (740 nəfər - qeydiyyatdan keçənlərin təqribən 40%-i ) 25-29 yaş, qadınlar üzrə ən çox namizəd (482 nəfər - qeydiyyatdan keçənlərin təqribən 40%-i) isə 20-24 yaş intervalında olanlardır. 60-64 yaş intervalı üzrə qeydiyyatdan keçənlərin sayı 6 nəfərdir və hamısı kişilərdir. Qadınlardan isə 55-59 yaş intervalında olan 4 nəfər qeydiyyatdan keçmişdir. Lakin yuxarı yaş intervalına aid kişi və qadın namizədlərin heç biri imtahanda uğur qazana bilməyib. Ümumiyyətlə, imtahanda iştirak edən 50 yaşdan yuxarı namizədlərdən yalnız 1-i imtahandan uğurla keçib.

Ümumilikdə isə imtahanda müvəffəqiyyət əldə edən kişi və qadınların 527 nəfəri, yəni 44.3%-i 20‑24 yaş intervalında olan namizədlərdir. Bu yaş kateqoriyasına aid olan 307 kişi və 220 qadın uğur qazanıb. 25-29 yaş intervalında isə cəmi 380 nəfər lazım olan balı toplaya bilib. Göründüyü kimi imtahanda uğur qazanan namizədlərin 907 nəfəri, yəni təqribən 90%-i yaşı 29-a qədər olan gənclərdir. 30-64 yaş intervalında olan və imtahanı uğurla keçən namizədlərin sayı cəmi 83 nəfərdir. Bu onu göstərir ki, gənclər dövlət qulluğunda çalışmağa daha meyillidirlər. Son illər bu sahədə həyata keçirilən tədbirlər və yaradılan imkanlar gənclərin dövlət qulluğuna daxil olmasını stimullaşdırır. Qeyd etmək lazımdır ki, dövlət orqanları tərəfindən müsabiqəyə inzibati icraçı vəzifələr üzrə (B növü) 1249 vakant vəzifə təqdim olunmuşdur və hazırda bu proses davam edir. Bu imtahandan uğur qazanan və sertifikat əldə edən şəxslər həmin vakant vəzifələr üzrə müsahibələrdə iştirak edəcəklər.

Digər statistik məlumatlarla aşağıdakı cədvəllərdə tanış ola bilərsiniz:

Ümumi məlumat

Yaş intervalı	Qeydiyyatdan keçmişdir	Test imtahanından uğurla keçib	Faizlə (%)
				20-24	1189	527	44.3
				25-29	1157	380	32.8
30-34	419	65	15.5
35-39	146	13	9.0
40-44	54	2	3.7
45-49	30	2	6.7
50-54	24	1	4.2
55-59	15	0	0.0
60-64	6	0	0.0
Cəmi:	3040	990	32.6

Kişi və qadınlar üzrə məlumat

Cinsi	Yaş intervalı	Qeydiyyatdan keçmişdir	Test imtahanından uğurla keçib	Faizlə (%)
					Kişi	20-24	707	307	43.4
					Kişi	25-29	740	219	29.6
Kişi	30-34	258	35	13.6
Kişi	35-39	93	6	6.5
Kişi	40-44	31	2	6.5
Kişi	45-49	21	0	0.0
Kişi	50-54	20	1	5.0
Kişi	55-59	11	0	0.0
Kişi	60-64	6	0	0.0
Kişilər üzrə cəmi:		1887	570	30.2
Qadın	20-24	482	220	45.6
Qadın	25-29	417	161	38.6
Qadın	30-34	161	30	18.6
Qadın	35-39	53	7	13.2
Qadın	40-44	23	0	0.0
Qadın	45-49	9	2	22.2
Qadın	50-54	4	0	0.0
Qadın	55-59	4	0	0.0
Qadınlar üzrə cəmi:		1153	420	36.4
Yekun:		3040	990	32.6