“IX sinif şagirdlərinin yazı işlərinin nəticələri ilə bağlı müraciətlərə baxılması üçün apellyasiya komissiyaları fəaliyyətə başlayacaq”.
“Report” xəbər verir ki, bunu Dövlət İmtahan Mərkəzinin (DİM) Bacarıqların, vərdişlərin qiymətləndirilməsi və markerlərin hazırlanması üzrə sektor müdiri Aydın Qasımov deyib.
O bildirib ki, apellyasiya komissiyaları mayın 1-i, 2-si, 3-ü, 6-sı və 7-də fəaliyyət göstərəcək: “Bunun üçün aprelin 24-ü, 25-i, 26-sı, 29-u və 30-da qeydiyyat olacaq. Qeydiyyatdan keçən şagirdlərin apellyasiya şikayətlərində iştirakı vacibdir. Eyni zamanda şagirdin özü ilə yanaşı, valideynlərindən biri də onunla birlikdə iştirak edə bilər”.
Qeyd edək ki, buraxılış imtahanları dörd zona üzrə martın 3-ü, 10-u, 17-si və 31-də keçirilib. Ümumilikdə, buraxılış imtahanlarında 115 mindən çox IX sinif şagird iştirak edib.