Yuxarı

BDU-nun tələbə və magistrları ƏƏSMN-in müəssisələrində təcrübə keçəcəklər

BDU-nun tələbə və magistrları ƏƏSMN-in müəssisələrində təcrübə keçəcəklər

Bakı. 17 yanvar. REPORT.AZ/ Əmək və Əhalinin Sosial Müdafiəsi Nazirliyi ilə Bakı Dövlət Universiteti arasında əməkdaşlıq haqqında anlaşma memorandumu imzalanıb. 

Bu barədə "Report"a Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən məlumat verilib.

Sənəd elmi-praktik əlaqələri inkişaf etdirmək, qarşılıqlı maraq doğuran sahələrdə mövcud təcrübəni bölüşməklə birgə və bərabər maraqlar əsasında əməkdaşlıq etmək, aidiyyəti fəaliyyət sahələrinin inkişafı üzrə qarşılıqlı nəticələrə nail olmaq məqsədinə xidmət edir.

Tədbiri BDU-nun rektoru Abel Məhərrəmov açaraq ölkənin sosial sahədəki qanunvericilik bazasının təkmilləşdirməsinin əhəmiyyətindən, Azərbaycan Prezidenti İlham Əliyevin uğurlu siyasəti nəticəsində sosial müdafiə sisteminin möhkəmləndirilməsindən bəhs edib. 2004-cü ildə ölkənin Avropa Sosial Xartiyasına qoşulduğunu deyən rektor Bakı Dövlət Universitetində sosiomühəndis layihələri hazırlamağı bacaran, müvafiq sosial xidmətləri istiqamətləndirə və realizə etməyə qadir olan mütəxəssis hazırlığı istiqamətində görülən işləri diqqətə çatdırıb.

Onun sözlərinə görə, 2005-ci ildə ilk dəfə olaraq BDU-da təhsilin magistratura, 2008-ci ildə isə bakalavr pilləsində sosial işçi hazırlığına başlanılıb, mütəxəssis hazırlığını təkmilləşdirmək, sosial işi elm və tədris sahəsi kimi inkişaf etdirmək məqsədilə Sosial iş kafedrası və sosioloji tədqiqatlar laboratoriyası yaradılıb. A.Məhərrəmov vurğulayıb ki, BDU ilə Əmək və Əhalinin Sosial Müdafiəsi Nazirliyi arasında sosial iş sahəsində mütəxəssis hazırlığı, innovativ sosial xidmətlər istiqamətində birgə əməkdaşlıq haqqında sənəd də məhz qeyd edilən məqsədlərə xidmət edir.

Əmək və əhalinin sosial müdafiəsi naziri Səlim Müslümov bildirib ki, 2018-2022-ci illəri əhatə edəcək “Azərbaycan Respublikasında sosial xidmətin inkişafı Konsepsiyası”nda da sosial xidmət sistemində insan resurslarının inkişafı, kadr potensialının beynəlxalq standartlara uyğunlaşdırılması əsas fəaliyyət istiqamətləri sırasında yer alıb: “2015-2017-ci illərdə icra olunmuş “Sosial xidmətin inkişafı” tvinninq layihəsi çərçivəsində də sosial xidmətlərlə təminatın modernləşdirilərək Avropa ölkələrinin ən yaxşı təcrübələrinə uyğun qurulması üçün müvafiq işlər aparılıb. Bu sahədə insan resurslarının inkişafı üçün strateji çərçivə, zəruri normativ-hüquqi sənədlərin layihələri, mütərəqqi dünya təcrübəsindən irəli gələn yeni “Sosial iş” modelinin ölkəmizdə tətbiqinə hazırlıqla əlaqədar bu model üzrə vəzifə təlimatı hazırlanıb. Həmin modelin tətbiqi ilə əlaqədar 4 pilot ərazi üzrə sosial işçiləri, ali təhsil müəssisələrinin aidiyyəti sahə üzrə müəllim heyəti üçün beynəlxalq ekspertlərin iştirakı ilə təlimlər keçirilib, onlara sosial xidmətlər sahəsində qabaqcıl beynəlxalq təcrübə öyrədilib”.

S.Müslümov sosial iş sahəsində yüksək ixtisaslı kadr potensialının formalaşdırılması üçün müvafiq ixtisasa yiyələnən tələbə və magistrantların təcrübi bilik və bacarıqlarının inkişaf etdirilməsinin vacib olduğunu vurğulayıb: “Bu memorandum “Sosial iş” ixtisası üzrə tədris prosesinin praktik sosial iş sahəsi, sosial xidmət müəssisələri ilə əlaqəli şəkildə səmərəliliyinin yüksəldilməsində yeni imkanlar açır. Bu sənəd eyni zamanda, sosial işçilərin ixtisasartırma və ya təlim keçməklə biliklərini artırmaları, ümumən bu sahədə təlim və təcrübə sektorlarının qarşılıqlı əlaqəsini təmin edən birgə və sistemli fəaliyyətin təşkili baxımından çox əhəmiyyətlidir”.

Sonra S.Müslümov və A.Məhərrəmov əməkdaşlığa dair anlaşma memorandumunu imzalayıblar. Sənəddə sosial iş və sosial siyasət sahəsi üzrə tələbə və magistrantları məlumatlandırmaq məqsədilə Nazirliyin müvafiq əməkdaşlarının Universitetin “Sosial iş” ixtisası üzrə təhsil alan tələbələri üçün ustad dərslərinin, habelə həmin ixtisas üzrə tədris prosesinin səmərəliliyini artırmaq məqsədilə Universitetin bakalavriat və magistratura pillələrində təhsil alan tələbələrinin Nazirliyin tabeliyindəki sosial xidmət müəssisələrində təcrübə və təlim keçmələrinin təşkil edilməsi nəzərdə tutulur.

Memorandumda həmçinin Universitetin “Sosial iş” kafedrası və onun tabeliyində olan “Sosioloji tədqiqatlar laboratoriyası”nın əməkdaşlarına sosial xidmət müəssisələrində elmi-tədqiqat işlərinin aparılması üçün şəraitin yaradılması, Nazirliyin müvafiq struktur bölmələrinin əməkdaşlarının Universitetdə müvafiq ixtisasartırma və ya təlim keçməsinin təşkili, Nazirliyin bu sahədə ehtiyaclarının müəyyən olunmasına yardım göstərilməsi, sosial iş üzrə beynəlxalq və milli səviyyədə akademik, elmi tədbir və təlimlərin, konfrans, seminar, simpozium və mühazirələrin, ümumən hər iki tərəf üçün maraq doğuran digər sahələrdə birgə işlərin təşkili və həyata keçirilməsi əksini tapır. Sənəddə əməkdaşlıq formaları da qeyd olunub. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi