Yuxarı

​BANM tələbələri SOCAR-AQŞ-də ödənişli yay təcrübəsi keçəcəklər

Bununla bağlı məktəbdə SOCAR-AQŞ MMC ilə əməkdaşlıq haqqında razılaşma imzalanıb

Bakı. 21 may. REPORT.AZ/ Bakı Ali Neft Məktəbinin (BANM) tələbələri SOCAR-AQŞ-də ödənişli yay təcrübəsi keçəcəklər. Ali Məktəbin İctimaiyyətlə əlaqələr şöbəsindən "Report"a verilən məlumata görə, bununla bağlı məktəbdə SOCAR-AQŞ MMC ilə əməkdaşlıq haqqında razılaşma imzalanıb.

BANM-in rektoru Elmar Qasımov imzalanan razılaşmanın məktəbdə "Neft-qaz mühəndisliyi" ixtisası üzrə yüksəkixtisaslı mütəxəssislərin hazırlanmasında xüsusi rol oynayacağını qeyd edib. O, bu əməkdaşlığın tələbələri üçün yeni təcrübə və gələcək karyera imkanları verəcəyini bildirib.

SOCAR-AQŞ MMC-nin baş direktoru Ramin İsayev birgə əməkdaşlığın gələcəkdə tələbələr üçün daha böyük imkan yaradacağına əminliyini ifadə edib.

SOCAR-AQŞ-nin nümayəndələri III kurs tələbələri ilə görüşüb və müəssisədə 2 aylıq yay təcrübəsi keçmələri üçün onların arasında seçim aparıblar.

Müqavilədə SOCAR-AQŞ-nin mütəxəssislərinin müəllim kimi BANM-də fənlərin tədrisinə cəlb olunması, tələbələr üçün SOCAR-AQŞ-nin fəaliyyət istiqamətlərinə uyğun mövzular çərçivəsində kurslar təşkil olunması, BANM-in tələbələrinin və məzunlarının SOCAR-AQŞ-də təcrübə, iş imkanları və digər məsələlər qeyd olunub. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi