Yuxarı

​BANM-in tədqiqat mərkəzinə gənc alim rəhbər təyin olunub

O, rektor Elmar Qasımovun dəvəti ilə Ali Məktəbin Kimya mühəndisliyi kafedrasında baş müəllim vəzifəsinə təyinat alıb

Bakı. 9 fevral. REPORT.AZ/ Bakı Ali Neft Məktəbində (BANM) müasir ixtisaslar üzrə mütəxəssis hazırlığını və aktual mövzular üzrə elmi tədqiqatların aparılmasını təmin etmək məqsədilə yaradılan Bərpaolunan enerji mühəndisliyi üzrə tədris və tədqiqat mərkəzinə Böyük Britaniyanın London İmperial Kollecinin məzunu Sənan Eminov müdir təyin olunub.

Bu barədə "Report"a Bakı Ali Neft Məktəbinin İctimaiyyətlə əlaqələr şöbəsindən məlumat verilib.

S.Eminov bu yaxınlarda London İmperial Kollecdə doktorantura pilləsini uğurla başa vuraraq Bərpaolunan enerji və ətraf mühit mühəndisliyi üzrə doktorluq dissertasiyasını müdafiə edib və alimlik (PhD) dərəcəsinə yüksəlib.

Sənan Eminov 1987-ci ildə Bərdə rayonunda anadan olub. Orta məktəbə Bərdə şəhəri 3 saylı orta məktəbdə başlayıb, sonra təhsilini Mingəçevir Özəl Türk Liseyində davam etdirib. Təhsil aldığı müddətdə “Kimya” fənni üzrə respublika fənn olimpiadalarında 3 qızıl medal qazanıb. O, 2003-cü ildə Yunanıstanda keçirilən 35-ci Beynəlxalq Kimya Olimpiadasında bürünc medal, 2004-cü ildə Almaniyada keçirilən 36-cı Beynəlxalq Kimya Olimpiadasında qızıl medal qazanıb, 2005-ci ildə Tayvanda keçirilən 37-ci Beynəlxalq Kimya Olimpiadasında Azərbaycanı layiqincə təmsil edərək qızıl medala sahib çıxıb. “Kimya” beynəlxalq fənn olimpiadaları tarixində ilk dəfə olaraq Tayvanda keçirilən Beynəlxalq Kimya Olimpiadasında imtahanın nəzəriyyə bölməsində ən yüksək balı (229 mütləq baldan 228 bal) topladığı üçün mütləq birinciliyə layiq görülüb və xüsusi mükafatla təltif olunub.

Olimpiadalardakı uğurlarından sonra Türkiyənin Orta Doğu Texniki Universitetinə qəbul olan Sənan Eminov I kursu bitirdikdən sonra təhsilini Almaniyanın Beynəlxalq Bremen Universitetində davam etdirib. Almaniyada təhsil aldığı müddətdə ilk elmi işi "Qallotanninlərin yaşıl çayın tərkibindən ekstraksiyası" mövzusunda olub. Sonra o, 2010-2011-ci illərdə SOCAR-ın təqaüd proqramı ilə Böyük Britaniyanın London İmperial Kollecində magistraturada təhsil alıb. Magistratura pilləsini bitirdikdən sonra Sənan Eminov Prezident İlham Əliyevin sərəncamı ilə təsdiq edilmiş "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” xətti ilə 2011-2015-ci illərdə London İmperial Kollecində doktorantura pilləsinə qəbul olub və orada Gələcək üçün enerji (Energy Future’s Lab) və professor Tom Veltonun rəhbərlik etdiyi Üzvi kimya və ekologiya laboratoriyalarında bərpaolunan enerji sahəsi üzrə elmi tədqiqatlar aparıb. Elmi-tədqiqat sahəsi ion mayelərdən istifadə edərək biokütlənin parçalanması və alternativ enerji mənbəyi olan platforma kimyəvi maddələrinə çevrilməsidir. Bu elmi tədqiqat işi yeni nəsil bioenerjinin alınması və tətbiqini əhatə edir. 

Bakı Ali Neft Məktəbinin rektoru Elmar Qasımovun dəvəti ilə Ali Məktəbin Kimya mühəndisliyi kafedrasında baş müəllim vəzifəsinə təyinat alan Sənan Eminov həmçinin, həmin mərkəzə rəhbər təyin olunub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi