Yuxarı
    Bağlamaq

    BANM-də professor Fuad Vəliyevin kitabının təqdimatı olub

    Tədbirdə BANM-in rektoru Elmar Qasımov və AMEA-nın vitse-prezidenti, akademik İbrahim Quliyev də iştirak edib

    Bakı. 22 aprel. REPORT.AZ/ Bakı Ali Neft Məktəbində (BANM) “Sinerji” Elmi Diskussiyalar Klubu çərçivəsində Ali Məktəbin “Neft-qaz mühəndisliyi” kafedrasının professoru, sözügedən klubun elmi koordinatoru Fuad Vəliyevin “Rekviyem” adlı kitabının təqdimatı keçirilib.

    Ali Məktəbin İctimaiyyətlə əlaqələr şöbəsindən “Report”a verilən məlumata görə, tədbirdə BANM-in rektoru Elmar Qasımov, AMEA-nın vitse-prezidenti, akademik İbrahim Quliyev, “Azərbaycan” jurnalının baş redaktoru İntiqam Qasımzadə və digərləri iştirak ediblər.

    BANM-in rektoru Elmar Qasımov əvvəlcə milli-mənəvi dəyərlərimizə sahib çıxan, əslini unutmayan bir müəllim, eyni zamanda mədəniyyətimizin xidmətində layiqincə dayanan bir məsul şəxs kimi Fuad Vəliyevin qələminin vurğunu olduğunu qeyd edib: “Fuad Vəliyev müasir müəllim olaraq tələbələrə biliklər ilə yanaşı, xalqımızın əqidə incəliklərin doğru çatdırılmasında nümunəvi alim və insandır”.

    Görüş kitabın videotəqdimatı ilə davam edib.

    Natiqlər Fuad Vəliyevin kitabının əhəmiyyəti, aktuallığı və onun müasir dünyanın ən qaynar problemləri haqqında düşüncələrindən bəhs ediblər. Müzakirələr zamanı qeyd olunub ki, müəllifin şeirlərində təqdim olunanlar - xeyir və şər haqqında tarix və onun dərsləri, ətrafda baş verənlərə hər kəsin məsuliyyətliliyi alimin ciddi düşüncələridir.

    Tədbirdə iştirak edənlər öz təəssüratlarını bölüşərək vurğulayıblar ki, müəllifin bu şeirləri vətəndaş mövqeyi ilə yanaşı onun poetik istedadının məhsuludur. Tədbir iştirakçıları Fuad Vəliyevin çoxillik və müxtəlif şaxəli müəllimlik fəaliyyəti, elmi tədqiqat və yaradıcılığı haqqında danışaraq bildiriblər ki, onun həyatı tələbələri üçün olduqca yaxşı nümunədir. Qonaqlar Fuad Vəliyevə və BANM-nin rəhbərliyinə belə maraqlı bir görüş təşkil etdiklərinə görə təşəkkür ediblər.

    Diskussiya Ali Məktəbin tələbə, professor müəllim-heyəti və qonaqlar arasında müzakirələr, mövzu ətrafında səsləndirilən fikirlərlə yekunlaşıb.

    Qeyd edək ki, BANM-in “Sinerji” Elmi Diskussiyalar Klubunun yaradılmasında əsas məqsəd tələbələri, gənc alim, pedaqoq və mütəxəssisləri dəqiq və humanitar elmlər, mühəndislik üzrə yeni nailiyyətlər, aktual problemlər, perspektivlər barədə məlumatlandırmaq, elmi-praktiki diskussiyalara cəlb etmək, elmi-tədqiqat işinə həvəsləndirmək, onlarda yaradıcılıq vərdişləri, diskussiya aparmaq, çıxış etmək mədəniyyəti formalaşdırmaqdır. Klubun fəaliyyəti dövründə müxtəlif aktual mövzularda aparıcı elm adamlarının, yerli və xarici mütəxəssislərin, idarə və müəssisə rəhbərlərinin məruzələrinin dinlənilməsi, disputlar, "dəyirmi masa"lar, tələbələrin elmi-texniki-humanitar mövzularda çıxışları, onların tədqiqat işlərinin müzakirəsi, informasiya mübadiləsi nəzərdə tutulur. Klubun gələcək diskussiyalarında BANM-in heyəti ilə yanaşı, maraqlanan hər kəs iştirak edə bilər.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi