Yuxarı
    Bağlamaq

    Bakı məktəblərində Xocalı faciəsinə həsr olunmuş silsilə tədbirlər keçirilib

    Bakı. 26 fevral. REPORT.AZ/ Bakı Şəhəri üzrə Təhsil İdarəsinin tabeliyindəki ümumi təhsil müəssisələrində Xocalı soyqırımının 26-cı ildönümü ilə əlaqədar silsilə tədbirlər keçirilib.

    İdarənin İctimaiyyətlə əlaqələr sektorundan "Report"a verilən məlumata görə, təhsil müəssisələrində “Xocalı uşaqların gözü ilə”, "Xocalısız 26 il", “Bir yurd vardır-Xocalı”, "Qar üstündə Xocalı qanı", "Xocalı qətliamı dünya tarixinin qan yaddaşında", "Xocalı qətliamı erməni faşistlərinin insan təfəkkürünə sığmayan vəhşiliklərinin qanlı izidir", “Qanlı gecə”, “Xocalıya gedən yol” mövzularında dərslər, konfranslar, mühazirələr, “dəyirmi masa”lar, ədəbi-bədii kompozisiyalar və rəsm müsabiqələri təşkil edilib.

    Tədbirlərdə faciə qurbanlarının xatirəsi birdəqiqəlik sükutla yad edilib, Xocalı faciəsinin tarixindən bəhs olunub. Dərsləri tədris edən müəllimlər fevralın 25-i gecə saatlarından şəhərin toplardan və ağır zirehli texnikadan şiddətli atəşə tutulmağa başlanıldığını və fevralın 26-sı səhər saat 5 radələrində şəhərin tamamilə alova büründüyünü bir daha şagirdlərin diqqətinə çatdırıb. Qırğın nəticəsində 63-ü uşaq, 106-sı qadın, 70-i qoca olmaqla, 613 Xocalı sakini qətlə yetirildiyi, 8 ailənin tamamilə məhv edildiyi, 1275 nəfər əsir götürüldüyü bildirilib.

    Tədbirlərdə məktəblilər Xocalı faciəsində xalqımızın başına gətirilən dəhşətləri, dinc xalqa divan tutaraq misli görünməmiş vəhşilikləri törədən düşmənlərimizi heç zaman unutmamağa səslənilib.

    Şagirdlər Vətənə, doğma torpağa olan sədaqət və məhəbbət duyğularını müxtəlif şeirlər, ədəbi-bədii kompozisiyalar vasitəsilə nümayiş etdiriblər.

    Xocalı soyqırımı ilə əlaqədar təhsil müəssisələrində divar qəzetləri, stendlər və guşələr məktəblilər arasında müxtəlif mövzularında inşa yazı müsabiqələri keçirilib.

    Həmçinin təhsil müəssisələrində Xocalı faciəsi barədə filmlər nümayiş olunub, məktəblilərin və təhsil işçilərinin şəhid ailələri və soyqırımı şahidləri ilə görüşləri keçirilib.

    Qeyd edək ki, fevralın 26-da paytaxtın ümumi təhsil müəssisələrində ilk dərslər Xocalı soyqırımına həsr edilib. Eləcə də Xocalı soyqırımının 26-cı ildönümü ilə əlaqədar təhsil müəssisələrinin müəllim və şagirdlərinin “Ana harayı” abidə kompleksinə ziyarətləri təşkil olunub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi