Yuxarı

Bakı Ali Neft Məktəbi və Ruse Universiteti arasında əməkdaşlıq haqqında razılaşma imzalanıb

Bolqarıstanın Angel Kançev adına Ruse Universitetinin rektoru BANM-də olub

Bakı. 20 aprel. REPORT.AZ/ Bakı Ali Neft Məktəbinin (BANM) rektoru Elmar Qasımovun dəvəti ilə Azərbaycanda səfərdə olan Bolqarıstanın Angel Kançev adına Ruse Universitetinin (AKRU) rektoru, professor Xristo İvanov Beloyevin rəhbərlik etdiyi nümayəndə heyəti BANM-də olub. Bu barədə "Report"a Ali Məktəbin İctimaiyyətlə əlaqələr şöbəsindən məlumat verilib.

Bolqarıstanın Angel Kançev adına Ruse Universitetinin rektorunun rəhbərlik etdiyi nümayəndə heyəti və bu ölkənin Azərbaycandakı səfiri Maya Xristova BANM-in rəhbərliyi, professor-müəllim heyəti və tələbələri ilə görüş keçiriblər. Görüş çərçivəsində BANM və AKRU arasında əməkdaşlıq haqqında razılaşma imzalanıb.

Bakı Ali Neft Məktəbinin rektoru Elmar Qasımov Azərbaycanla Bolqarıstan arasındakı tarixi münasibətlərdən, BANM-in yaranma tarixi, fəaliyyəti, məqsədləri, xarici şirkət və universtitetlərlə yaradılan əməkdaşlıqdan bəhs edib. BANM-in növbəti tərəfdaşı Ruse Universitetinin olacağını bildirən rektor imzalanan razılaşmanın bakalavriat səviyyəsində mütəxəssis hazırlığında və qarşılıqlı maraq doğuran sahələrdə birgə elmi araşdırmaların aparılmasına imkan yaradacağını qeyd edib.

Bolqarıstanın səfiri Maya Xristova iki dost ölkənin universitetləri arasında əməkdaşlıq haqqında razılaşmanın əldə olunmasından şad olduğunu bildirib və bu əməkdaşlığın Azərbaycanın və Bolqarıstanın təhsil sahəsindəki ikitərəfli tərəfdaşlığının inkişafına təkan verəcəyinə əminlik ifadə edib.

Angel Kançev adına Ruse Universitetinin (AKRU) rektoru, professor Xristo İvanov Beloyev nümayəndə heyəti və öz adından Azərbaycanda və BANM-də olmaqdan məmnunluq ifadə edib və bu dəvət üçün rektor Elmar Qasımova öz dərin təşəkkürünü bildirib. O, rəhbərlik etdiyi ali təhsil ocağı haqqında təbdir iştirakçılarına geniş məlumat verib. AKRU-nun avtonom dövlət ali məktəbi olduğunu qeyd edən rektor, universitetdə 10 000 tələbə və doktorantın təhsil aldığını, universitetin iki filialının, 8 fakültəsinin və çoxsahəli mərkəzlərinin fəaliyyət göstərdiyini qeyd edib.

Sonra BANM və AKRU arasında əməkdaşlıq haqqında razılaşmanın imzalanma mərasimi keçirilib. Əməkdaşlığın əsas məqsədi BANM-də "Proseslərin avtomatlaşdırılması mühəndisliyi" ixtisası üzrə yüksək ixtisaslı mütəxəssislərin hazırlanması üçün bakalavr hazırlığı proqramı çərçivəsində tədris olunacaq fənlərin materiallarının AKRU tərəfindən BANM-ə verilməsi, tədris prosesinin təşkilinə metodiki yardımın göstərilməsi, eləcə də müxtəlif maliyyə mənbələri hesabına birgə elmi-tədqiqat işlərinin aparılmasını təmin etməkdir.

Sonda Bolqarıstanın Angel Kançev adına Ruse Universitetinin rektoru Xristo İvanov Beloyev BANM-in "Fəxri qonaq" diplomu ilə təltif olunub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi